Émissions Toutes les émissions

Masai

Masai: Eranu trenta vascelli

Podcasts :

Segò ci monta a segà

Eranu trenta vascelli… à u largu di u Capicorsu, à difende e nostre coste contru à u battellone fracicu, prontu à rivucà i so puzzicheghji in Tuminu, u paese di Francescu Orlandi. O in altrò.

Eranu trenta vascelli, sbanderendu Teste More è fede arcana venuta da u più prufondu di l’antica Corsica arrabiata. È anu vintu. Purtati da issa vittoria, l’Invincibbile Armada, cù in testa Gherardu Romiti è Alanu Mosconi, vulia andà à ricunquistà à Capraia, isula Corsa inghjustamente passata sottu à u cuntrollu di l’Italia. Peccatu, Gigliu Simeoni l’hà ragiunati, prupunenduli di falla una altra volta. Ma quantunque, serebbi statu qualcosa da ùn mancà, trecentu Corsi, maschi è femine di meza età, saltendu nant’à u molu di u purticellu di Capraia, cun chjirli spaventosi, accolti cum’è liberatori, da l’isulani di l’isulottu, impauriti ma cuntenti. D’avanti à l’ochji di Segò ch’averia capitu ch’ùn ci vole à muntacci a segà.

Peccatu.

Eranu trenta vascelli, chì si ne so vultati, fieri è una criducula di più intelligenti, chì anu capitu qualcosa d’impurtante: per difende u Canale di Corsica duv’elli passerianu tremila battelli à l’annu carchi de veleni, ùn ci vole à cuntà nant’à u Prefettu Maritimu chì hà i so scagni in Tulò. Ete intesu a so intervista nantu à RCFM, vennari. Petruluigi Sardi l’hà fattu una dumanda semplice: a sapete chì passanu tremila tankers à l’annu à u largu di a Corsica, catastrufe eculociche putenziali. “Ha bon ..?”,  li risponde u Prefettu Maritimu, amirale ind’u civile, “ùn la sapia micca, sò cuntentu chè vo mi faccete a dumanda.. je vais m’en enquerir ”.

In fatti, ùn ci hè nisun mezu di prontu. Si unu di i petrulieri chì ci passa sott’à u nasu, à noi è à i nostri fratellu Tuscani, si mette à cacà in mare, ùn ci hè nunda di previstu. “Ha bon ..?”  hà rispostu u Prefettu Maritimu, amirale ind’u civile.. je vais m’en enquerir ”. Piglia u to tempu...

In corte parulle, Segò ci monta a segà.

Eranu trenta vascelli, chì anu finalmente riesciutu à pone publicamente a quistione di a navicazione in u Canale di Corsica. Ghjè quessu u grande resultatu di a spedizione maritima di l’Invincibbila Armada.

Ci simu avvisti chì, issa prublematica impurtantissima per noi è pè i Tuscani, ùn pisava nunda in Parigi.

Masai: Eranu trenta vascelli