Émissions Toutes les émissions

Masai

Masai: Fidighjendu u celu 2

Simu ciò chè no ghjittemu

Hà vintu Chjachjarelli !.. Quand’eo n’aghju una techja di suppurtà a dialetica pulitica chì accampa u centu per centu u spaziu vitale, affughendu tuttu u restu, pesu u capu è fideghju in celu, ciò chì gira intornu à a terra.

Vultemune à  u discorsu d’eri: i spazionauti, cosmonauti, astronauti -ch’un ghjornu ci vulerà à mettesi d’accunsentu nant’à un appellazione unica-,  facenu quaranta anni ch’elli cacanu in orbita intornu à a terra. In quarant’anni, 553 umani anu staziunatu in u spaziu. Elli sò vultati pè u più. Ma ete mai vistu rivene qualcosa di u so fà di corpu ? Mai. Resultatu? Pisendu u capu, guardu issi punti neri chì gallighjeghjanu in u spaziu. Ghjè l’errente materia di quaranta anni di cunquista spaziale, nocciuli di futuri asteroiti, di pianete future.

Rivenimu à e legi di a gravitazione. Un ghjornu, in u spaziu, un stronzulu eserciterà a so forza d’attrazione nant’à un altru, creendu un cunglumeratu chì più cresce in putenza d’attrazzione, s’attundulisce, è più aglutineghja materia spaziale – flacchiti ! flacchiti ! –, ingrussendu sin’à diventà una pianeta, un ghjornu. “Un ghjornu”, facciu per dì, chì in u spaziu ùn ci hè nè ghjornu nè notte. Ghjè una vera pussibbilità scentifica, l’aghju letta nantu à a rivista Nature, una pianeta formata solu da ciò chì l’omu cappia o ghjetta in l’etere.  

I telescupi,  à rombu di vistigà u spaziu per sapè sì a vita esiste à cantu à a pulitica, un bellu ghjornu - facciu per dì, chì in u spaziu ùn ci hè nè ghjornu nè notte- anu da puntà u cannuchjale nantu à una spezie di pianeta diversa, fatta d’una materie scunnisciuta, nè dura nè molle, accinta d’un anellu chì bufuneghja. E teurie s’anu da cuntrastà, i sapienti s’anu da piglià à murtaiate nantu à l’interessu, a custituzione, e putenzialità vitali di issa pianeta, tectonica ma non troppo. Un ghjornu manderanu una missione à vede sopr’à locu, avanguardia d’un pussibbile pianu di terrafurmazione, poi di culunisazione.

 

Pensu à l’Armstrong di tandu. Sicuramente chì averà appruntatu una frase storica, falendu e scali di u modulu. Aspetterà, per cappialla ghjustu quand’ellu metterà u pede nantu. O nentru. Chì dicerà l’Armstrong di tandu? Ciò chè no dimu tutti in iss’occasione: “è merda !” . Serà u primu passu di a terrafurmazione.   

 

Masai 03 04 14 Fighjendu u celu, parte 2 - Masai