Émissions Toutes les émissions

Masai

Masai: Via Francigena 1

Podcasts :

Viaghjendu nantu a Via Francigena , parte 1

Eccumi vultatu da una settimana di caminata nantu à u chjassu chì traversa a Tuscana da nordu à sud. Ghjè una purzione di a Via Francigena, chì parte da Canterbury, vicinu à Londra, varca a Francia, poi l’Italia è ghjunghje in Roma. U tracciatu di issu chjassu, hè quellu imbuccatu da Sigericu, arcivescuvu di Canterbury. In 990 hè andatu in Roma à pregà nantu à è tombe di l’apostuli Petru è Paulu, fendu 1700 chilometri in 81 ghjorni. Dopu, fù chjamata issa strada “Francigena” chì ghjè diventata u chjassu di i Franchi chì andavanu in Roma. U caminu cuntinueghja sin’à Brindisi in u sud di l’Italia. Fù a strada di i cruciati chì i purtava in Terra Santa.

Issa Via Francigena, hè chjappa oghje da i pellegrini è da quelli, religiosi o laichi, chì cercanu una via alternativa per scopre u mondu. Entre in una rete di chjassi chì a lega à a Via Tolosana in Francia è a a strada di San Ghgjacumu di Cumpustella in Spagna. In 2004, hè stata ricunnisciuta in quant’è “grande itinerariu Culturale di u Cunsigliu di l’Europa”  è trattenuta, curata. Nant’à u parcorsu  ci sò piccule osterie o cuventi chì si sò fatti una spezialità d’accoglie i caminenti.

Pellegrini frà i quali era ancu eo, una settimana sana. Viaghjendu si vede u mondu da più vicinu. Un mondu abitatu o micca, in u quale si penetra pianu, incù una misura di u tempu diversa: solu conta a stonda ch’omu campa, u presente chì ci traversa. Si finisce per cunfondesi omu incù a natura.

Viaghjendu, mi sò venuti issi versi di u pueta Spagnolu Antonio Machado:

Cuando el poeta es un peregrino, ”cuando de nada nos sirve rezar. "Caminante no hay camino, ”se hace camino al andar..."

« Quandu u pueta hè pellegrinu,

Quandu à nunda ghjova di pregà,

Caminente, caminu ùn ci n’hè,

U caminu si face viaghjendu...”

Masai 10 06 14 Francigena 1 - Masai