Toutes les émissions Émissions

Masai : Via Francigena 2

U turismo o a vita, ci vole à sceglie...

Sapete una cosa ? Forse a v’aghju detta eri, ma finalmente vale d’esse ripetuta : caminendu, si fideghja megliu u mondu. U squardu, più tranquillu, penetra di più.

Viaghjendu à pedi in Tuscana a settimana scorsa, aghju vistu u turismu ciò ch’ellu pò pruduce in certi lochi quand’ellu hè a sola leva di l’ecunumia. In qualchì paese o cità, u turismu s’hè manghjatu tuttu, per principià,  a cummunità chì ci stava. Citeraghju solu u casu di Monteriggioni, bellissimu paisone di u rughjone di u Chianti. S’hè datu tutalmente à u turismu: si ne và tuttu in ristoranti, alberghi, B and B, hotel è butteghe di prututti tipici à un prezzu scemu. Parlendu cù a ghjente, mi sò avvistu chì abbitanti ùn ci n’hè più, sò scappati. L’ecunumia turistica incù i si rimori, a so gestione specifica di u spaziu è di sò i ritmi di vita, hà mandatu fora l’abbitanti. Monteriggioni s’hè mutatu in un paese museo. Belle case antiche di u 12e seculu, chjese, capelle, strette medievali, vasi di fiori in ogni locu, turisti in short chì piglianu e fottò. Ma si fiata un aria di morte, mancanu i gridi di i zitelli, e lenzole appicate à e finestre, l’eppisseria, u panatteru, u marcante di giurnali, u caffè duv’elli si trovanu l’abbitanti. Manca a vita è a so estetica. U turismu è i so marcanti anu mandatu l’abbitanti fora è l’abbitanti si sò lasciati fà. Puru sì avà si pentenu,  quandu, da u paese novu in fondu di a valle, venenu in spassighjata à infattà i fantasmi di u passatu. Dicenu l’abitanti fughjiti, ch’ella era pussuta andà altrimente, chì l’equilibru ragiunevule trà u turismu amaestratu è a vita vera si pudia, si duvia creà, cum’è in tanti altri lochi di a Tuscana. Dicenu ch’elli ùn devenu vince i marcanti di u turismu chì sterilizeghjanu tuttu.

Bella lezziò per noi in Corsica, chì più và è più ci imputtanimu incù u turismu in a nostra tragedia suciale. I senza travagliu s’avvedenu chì aprendu una buttea, un ristorante, un bifore o un after, ci ponu caccià un stanta pane, è si capisce. Ma cum’’è in Monteriggioni è in altrò, ci vole chì a cità  s’acconcie è dia i centri storichi, viutati di l’abitanti, à l’ecunumia turistica.

Ci vole à pensacci forte è prufondu, prima di lascià u guvernu à i marcanti di u tempiu.

Masai Via Francigena 2

Partager sur :