Émissions Toutes les émissions

Masai

Masai: Via Francigena 3

Zappà in l'ortu di i frati...

N’aghju vistu ghjente, nant’à i chjassi di Tuscana, a settimana scorsa. Ghjente ch’ùn si pò infattà ma chè caminendu.

Aghju fattu sosta in Pieve di Cellule, à trè chilometri da San Gemignanu. In issu locu, ci hè una chjesa rumanica di u dodecesimu seculu è un anticu cunventu chjamatu oghje Monasteru di Bose. Ci campanu cinque frati giovani chì cultivanu, danu alloghju è manghjà à chì dumanta  è vendenu ropa fatta da elli, à i turisti. L’incontru hè statu incu u frate urtulanu Ghjuvanni, 35 anni. Amaestra u so ortu cum’e un cantu –è un incantu- di Paradisu. I legumi sò posti in un ordine tuttu tuscanu: e bietule, i pomidoru, e cipolle, l’insalate, tuttu he allignatu nettu e squatratu, per categuria, in lenze curate da issu curatu. Sì l’organisazione di l’ortu di u frate era solu quessa, ùn ci serebbi statu altru nunda a dì e dunque mi serebbi taciutu. A grazia celesta sò i fiori, imbulighjati incù i legumi. Rosule antiche chi prufumanu, rosse pe u più , ma ancu garofani bracanati, geragni è altri fiori ch’eo ùn vi saperebbi dì. L organisazione raziunale, utile, di i legumi, hè dolcemente pervertita da i culori è i balsami fiurili, sparti à mezu à i solchi di fasgiuletti è di cipolle, in u pueticu disordine di u gardinu chì si cunfonde cun l’ortu. L’inseme custituisce tutt’altre cosi, che una simetria squatrata e fredda. Ghjè l’intervenzione di u bellu in l’utile. Hè quessu u secretu di a felicita di patre Ghjuvanni. Si leghje, in u so surrisu aerianu, chì a so relazione intima incù u Celu corre di più in u so ortu-giardinu, chè in i salmi bicutidiani intunati in a cappella.

Issu ghjornu, aghju capitu cosa si pudia intende in l’espressione “zappà in l’ortu di i frati”

Masai : Via Francigena 3