Toutes les émissions Émissions

Masai: Via Francigena 4

L'orca

Hà ùn sò quanti decalitri di tette. È una buccona. Ghjè a pastizzera di Montecchino, un paisone trà  San Geminiano è Sienna, duv’è no ci simu cansati incù i trè o quattru culleghi di a RAI, chì caminavanu nant’u a Via Francigena cun mè.

Aviamu sete è fame entrendu in u carrughju principale, quand’è n’emu vistu, prima a pastizzera è dopu a pastizzeria. Una dunnona bruna tamanta, abbudente. Arritta nant’à u sigliare di l’usciu, guardava ridendu a nostra avvivinata stanca. Si manghjava un “cornetto”, un croissant à l’usu di quallà. Normalmente, una donna cusì li so ghjoca à a risa. Ùn emu avutu u curagiu, ci duminava di sguardu. Paria una orca, sapete isse balene bianche è nere chì si manghjanu un delfinu sanu sanu incù a so buccona piena di denti. Subbitu, l’emu dumandatu d’indittacci a strada per ghjunghje in Sienna à pedi. Ci hà spiegatu in quattru frase, i girivolta per riattaccà a Via Francigena. Ghjera esattamente u cuntrariu di ciò ch’elli dicianu i nostri piani, ma nisunu hè statu à bastanza arditu per falline a rimarca. In più, ridia sempre guardenduci. E so tette spaventose trimulavanu à tempu à e scaccanate. Simu entrati in buttea à pigliacci qualchì curnettu. Eramu morti di fame. Ella, à ogni volta ch’ella ci ne vindia unu si ne manghjava unu. Per mette una cria d’untu in e relazioni, l’aghju dettu: “o madama sè vo fate cusì vi manghjate u benefiziu”. M’hà fidighjatu ridendu, l’ochji freti è u capitinghjulu aggressivu. Da a so bocca, schizzavanu i pezzi di croissant. Aghj’avutu un trimuleghju in a spinatoghja è un scrachju di croissant in un ochju. Ùn m’hà mancu rispostu.

L’orca ùn si struzzica.

Pensava  à u corciu di u so maritu, magrentinu è mischinellu. Un piunieru. Quand’ella tuccherà à e donne di piglià u cummandu d’una sucietà diventata matriarcale, guverneranu l’orche, cum’è a pastizzera di Montecchino.

Ci ne simu andati capighjimbi è scuragiti, chjappendu una direzzione chè no sapiamu falsa, chì ci ferebbi fà trè chilometri in più.

Ma l’orca ci guardava.

masai: Via Francigena 4

Partager sur :