Émissions Toutes les émissions

Masai : Ghjudici, solu di noi stessu

Spassighjata incù Levi Strauss

L’altru ghjornu, ascultava nantu una radiu a ridiffusione d’una intervista di l’etnolocu filosufu Claude Levi Strauss. Ci hè statu un mumentu forte, perchè attuale assai, quand’ellu hà spiegatu a necessità d’ùn ghjudicà micca a cultura di l’Altru. Per esse più precisu, l’impussibbilità di ghjudicà una altra cultura chè propiu a soia stessu. Issi ghjudizii nant’à l’altre culture, sò fatti sempre in riferenza à a nostra. Levi Strauss spiega chì, ierarchia ùn ci ne pò esse trà di culture. Ùn ci n’hè una chì supraneghji à l’altra. U filosufu suciolucu, hà chjappu l’esempiu di i treni per spiegà a diversità di e culture : e culture sò treni chì si movenu in direzzioni diverse è in vitezze diverse dinù. Vole dì chì a ligna di sviluppu d’una altra cultura ùn hà significatu per noi, vistu ch’ella ùn si pò misurà incù e riferenze chè noi adupremu.

In i so studii, Levi Strauss s’hè avvistu chì u prugressu ùn hè nè necessariu, nè cuntinuu. Avanza à salti, à scatti, à mutazioni. Spessu in direzzioni diverse. È poi, in più bella, accade chì – è quì citu à Levi Strauss- « a simultaneità di i scunvugli tecnulocichi in parechji punti di a pianeta, luntani l’uni di l’altri, ci indetti chì isse revuluzioni o isse evuluzioni, ùn eranu duvute à l’ingegnu d’una razza o d’una cultura, ma sò dipendute di cundizioni generali al di fora di a cuscenza umana. Esempiu : a Revuluzione Neolitica è a Revuluzione Industriale, nate ognuna in parechji lochi à tempu». Quì finisce a citazione.  

Issu ramentu di Levi Strauss, mi pare ch’ellu casche cum’è casgiu nant’à e nostre lasagne, oghje, in issi tempi di cunfrontu. Ùn ghjudicà micca a cultura di l’altru, vale per noi, ma vale per l’altru dinù. Mancu ellu ùn deve ghjudicà.

Aghjusta u filosufu chì, in nome di a tulerenza, tuttu ùn hè relativu è quessa cumplicheghja assai e cosi. In nome di a diversità culturale, ùn si pò dumandà rispettu pè, mettimu, e mutilazioni sessuali di e quali e donne sò vittime è tutte e pratiche avviliscenti per l’umani. Ciò chì ghjè cuntrariu à a murale cullettiva chì l’umanità s’hè custruita pian’ pianinu deve esse cundannatu. O sinnò, cunclude levi Strauss, « l’entrupufagia ùn seria mai chè una quistione di gustu ».

Issa base intellettuale, loda di a cumplessità, mi pare interessante per fundà e nostre opinioni.

 

 

 

Partager sur :