Émissions Toutes les émissions

Masai

Masai: A guerra di e cuppulate

Podcasts :

Tragedia in u Rizanese

Basta basta basta. Ùn si parli più di pulitica, di greve, di football.

Parlemu d’altre cosi, parlemu.

Tè, e testughjine. Parlemu di e cuppulate, cum’elli dicenu l’amichi Pumuntinchi.

Testughjine o cuppulate, u sugettu hè ghjalatu, ùn muca à nimu. Ùn hè pulitica, ghjè amore di a natura, di l’animali salvatichi. Zoofilia, alò, per dì e cosi cum’elle si chjamanu in veru.  

In a valle di u Rizanese, movenu e forze scure d’una tragedia fatale trà famiglie di testughjine.

Da una banda, Emys Urbicularis , a dolce testughjina nustrale, brava, chjuca, timica. Viaghja zitta zitta à passetti legeri legeri. Per ùn dirangià. Fà chì dica : ùn v’interrumpite par mè, ùn mi calculate, ghjustu passu, ùn ci fate casu. Daltronde sò digià passata. Saltichjeghja sin’à  l’episseria à cumprà u so latte magru in polvera. Hà un pocu di cholesterol. A so vita hè solu un soffiu chì face trimulà e frondi di i platani di u Rizanese.

Da l’altra banda, Trachemys Scripta Elegans, una testughjina alta è elegante, dunque. Ghjè Americana, vene da a Florida. Gattiva cum’è a pesta, incù a so testaccia rossa. Quand’ella passa, cunducendu u so hummer, sapete issi vitturoni spaventosi, larghi è alti, scialba in i cuntorni, scutumia, pretensione è puzza di hummer. Carca di figlioli è di chjirli, si para tuttu à nenzu, si rasca a vita di u Rizanese. D’aretu, hè terra brugiata, lacrime, addisperu è novu PLU.

Eccu i prutacunisti di a tragedia. Da una banda e cuppulate storiche, addebbulite da seculi di benestà - è di cunsanguinità, ci vole à dilla dinù. Da l’altra  e testughjine ghjunghjiticce, ch’anu in corpu issa foga terribbile, nata da seculi di miseria è di calci in culu. U decoru: a valle di u Rizanese, da l’Incudine à a Marina di Prupià, incù i so ghjallichi, i so foi, i so alzi, e so leccie, i so querci, e so mufre è i so cerfi, I so turisti in short, u so matrale, e so “residence secondaires”. I so cunsigli generali. U so merre di Prupià rielettu “haut la main”.

Chì serà u sboccu di issa cupa guerra chì, frà i ceppi di mintrastu, opponerà e duie famiglie di cuppulate ? Ùn si sà.

Finalmente ch’importa? Dece anni di presenza è u statutu di residente apparinerà tuttu.

Masai: A guerra di e cuppulate