Émissions Toutes les émissions

Masai

Masai: Hasta a tisana di rosumarinu, siempre

Podcasts :

Un gridettu di rivolta in una istatina addurmintata

Revuluzione

Minà un calciu ind’è u bugnu, incù issu gridu revuluziunariu : hasta a panzetta siempre  !

Ghjè un gridu cusì, ch’ellu ci vulerebbi à sente, per ch’ella si rende utila issa istatina molle, chì cola lentamente, limicosa, in a falata chì a porta à settembre.

Ùn si sente un zittu. Ognunu dice a soia in u so cantu. Simu ind’è u pulitu, u puliticamente currettu. Nisunu caca in u spazzatu, dapoi à e rinfacciate date da u guvernu. Ùn sò po micca e risette di e signore Lebranchu è Royal chì cambieranu qualcosa.

Minà un calciu ind’è u bugnu, chirlendu cum’un scemu : hasta a pulenda siempre ! Ghjè un simile mughju revuluziunariu, chì disciterebbi una Corsica addurmintata, cum’è in un dopu pranzu di mez’estate. Tuvaglie fiacche è cunvitu techju. Un mughju identitariu, chì colli da a trippa. Un mughju chì faccia trimà a curatella, trimulà u pappatoghju da l’emuzione è svulachjà, nant’à i fiori rossi di i pampasgioli è bianchi di i talavelli, i stoli turchini celesti di e farfalle maculinee. Di casata latina Maculinea Alcon Rebeli .

Nutate isse parulle, « pampasgioli », “talavelli” è « farfalle maculinee ». Prufittemu di a presenza  à l’ascoltu di i Corsi di u Cuntinente per falle entre in u patrimoniu favellinu. Tè, « favellinu ». Cinque minuti fà ùn esistia micca issa parulla. Forse, frà cinque minuti ùn esisterà più. Masai, a sola cronaca incù duie o trè parulle nove à chilò.

Dunque, Istatina Temestà è Valium. Cuntentemuci di minà, passendu, un calcettu tradimentosu ind’è u bugnu digià bellu sbranculatu, alzendu issu mughjettu revuluziunariu :

Hasta a tisana di rosumarinu, siempre

 

Masai: Hasta a tisana di rosumarinu, siempre