Émissions Toutes les émissions

Masai

Masai: Hè festa...

Podcasts :

Avia principiatu bè, purtantu...

Iè chì ghjè festa u 14 lugliu.

In Corsica ancu più chè in altrò, oghje s’alzanu e bandere di l’ideale universale di a Revuluzione, chì libereghja i populi è face avanzà l’Umanità. Si chjama u Prugressu. Certe volti u prugressu avanza ancu à calci in culu, hè vera, ma avanza.

Cumu, ùn la sapete ciò chì ci hè statu un 14 lugliu ? U 14 lugliu 1755, à u Cunventu di a Casabianca, in Castagniccia, ci hè statu un evenimentu revuluziunariu, finalmente più impurtante chè ciò chì ghjè accadu in Parigi, u 14 lugliu 1789. Perchè impurtante di più ? Ind’è perchè chì, issu attu revuluziunariu, hè capitatu 30 anni prima. Vogliu intende, l’elezzione di Pasquale Paoli cum’è Capu Generale di a Corsica, da a Cunsulta, vale à dì i rapresentanti di e Pievi, adduniti issu ghjornu in u Cunventu di a Casabianca. Revuluziunaria issa elezzione, perchè ghjustamente, hè una elezzione, in pienu in una epica di pudere assulutu. Issa elezzione di Pasquale Paoli, ghjè u primu attu di a Demucrazia chì nasce, in pienu mezu di u Seculu di i Lumi, u diciottesimu. Simu trenta anni prima di a Revuluzione Francese.

Un hè micca una ragiò per muntassi a sega. Attenti.

Listessu ghjornu, ma in u 1789, in Parigi, i Parigini azezi anu creatu a Piazza di a Bastiglia, rumpendu u vechju castellu chì ghjuvava di carcere sottu à Luigi XVI. Ghjè una data chì si rispetta. Dopu à l’affare di a Bastiglia, anu tagliatu u collu à u rè è à a so moglia è ghjè venutu Robespierre à cuntalli l’aghette à tutti. Robespierre, u sceffu di u Terrore, ch’hà scapatu u mezu mondu è inventatu a Guigliuttina. Ci hè statu un periodu di transizione, cortu, poi Napuleonu s’hè fattu imperatore. Dopu è ellu, a l anu pruvata duie o trè rè di poca impurtanze, un altru imperatore è infine hè principiata in veru a demucrazia, incù a Terza Republica, in 1870.

Femu i conti. Dopu à a caduta di a Munarchia assuluta, in u 1789, in ottanta anni,  a Francia hà sperimentatu sette regimi pulitichi : 3 Munarchie Custituziunali, duie Republiche chì ohimè, è dui Imperi. A Demucrazia ci hà messu u tempu.

Allora, in Corsica, avemu tutte e ragiò di manghjà e manfare u 14 lugliu. Avà, hè vera chì a storia di u Babbu di a Patria è di l’indipendenza di a Nazione, s’hè compia in pappina, ma avia principiatu bè, quantunque. Un 14 lugliu.

Micca chì, forse ùn hè finita.

Masai : Hè festa...