Émissions Toutes les émissions

Masai: Hè ora ch'ella finisca

Struzzicanu u vespaghju o chè?

Curiosa a strategia Corsa di u guvernu ùn hè?

Allora chì tuttu porta à a pace è à a discussione, u guvernu risponde cù ricusi è ondate d’arrestazioni, in l’ambienti nazionalisti ch’anu rinunziatu à a lotta armata. Ghjè quant’è sì certi in Parigi, struzzichendu u vespaghju, si davanu di rimenu per ch’ella ripiglie.

Soca e perpetive in u campu strettamente puliticu li facenu paura ? Serà quessa? Hè vera chì a Corsica hè custretta avà à una risposta pulitica, larga, unitaria è pupulare, à l’attitutine negativa chì Parigi oppone à i prugetti vutati à l’Assemblea di Corsica. Issi voti, isse pruposte, in fin’ di contu portanu à una pattighjata nant’à u fondu, trà i rapresentanti di a Corsica è quelli di u guvernu, per entre, dopu tanti parapiglia, in una fase di fine di cunflittu, di custruzione.

Ùn si sà per avà s’ella piccerà issa risposta unita di i Corsi, ma omacaru, devenu pensà une pochi in Parigi, tuttu ciò chì a puderebbi rallentisce, ghjova.

Serà cusì o sò cianfule? Ma ùn serebbi ora ch’ella finisca issa cumedia trà Parigi è a Corsica, chì anu da fà cinquant’anni ch’ella dura? Ùn serebbi ora chì qualchissia, in i palazzi di a Republica, invite à voce alta à pusà, à pensà, à ragiunà è a decide, per lascià entre a Corsica in u ventunesimu seculu, duv’elle sò digià novantacinque per centu di e regioni d’Europa? Ùn serebbi ora di falla finità cun l’opposizione trà una vuluntà di prugressu chì s’esprime in l’isula è in altrò è un ideale dettu republicanu, ereditatu di a Revuluzione Francese è chì oghje s’hè fattu reazziunariu nant’à parechji aspetti?

A vita hè muvimentu. L’idee arrestate sò idee morte.

Masai: Hè ora ch'ella finisca

Partager sur :