Émissions Toutes les émissions

Masai

masai: I benevulenti

Podcasts :

Homo Erectus-ma-micca-sempre contru à Homo Grattacugliunis

Iè, s’hè fatta rifà e labre. Pare una alien. Hà trè paghje di labre chì li sbuccianu da a faccia, cum’una potta marina mustruosa. Peccatu. Era belluccia. Avà hà trè paghje di labre.

Eo a chjamu Madama Boccassai.  Ma l’affare hè piuttostu u so maritu. Ghjè un benevulente. Un benevole un francorsu.

U benevulente hè un mammiferu è dui pedi di a famiglia Homo Erectus, ma micca sempre. Soprattuttu quand’ellu hè u maritu di Madaama Boccassai. U pudete infattà in e sale pulivalenti, duv’ellu s’addunisce incù quelli di a so sterpa.

À osservalli, i benevulenti si cuncoltanu in bande à un signale misteriosu, capitu da elli solu, a cunvucazione. I videte, in parechji lochi, accolti in gruppetti, straparlenti è sbraccitendu, ochji sburlati. Sò spettinati, faccibianchi è si letecanu nant’à u miglior’ modu di squatrà u budgettu di u cumitatu di e feste: una lutteria o une serata custipole?

In issu mentre, Madama Boccassai aspetta u maritu telefunendu à so amica, Madama Petti-Rifatti, moglia di benevulente ancu ella ... 

U benevulente hà un nimicu à cultellu (di cucina), l’Armemuci-è-Partite. E so urigine sò incerte: Homo Grattacugliunis? Ùn si sà... Ghjè dinù ellu un mammiferu bipede, ma inc’un cervellu chjucu chjucu. U so linguaghju hè limitatu à una sola parulla: “riservite”.

Ciattu ciattu, l’Armemuci-è-Partite aspetta chì u so nimicu faccia una mossa sbagliata, una falsa stecca, per zirballi u so velenu. Un velenu chì face calià u benevulente, chjappu da una malatia gravissima: u scuraggiamentu, a muralattappetita. I sintomi: mandamentu à cacà di Madama Boccassai è di u creatu sanu, strappazione rabbiosa di cunvucazione, ciavattamentu futtuglinu, televisioneria, maghjincà fasgiulum, aritiratu in u so ortu, lavabo manum di tuttu.

In issu tempu di crisa, s’avvede omu chì l’Homo Grattacugliunis hà pigliatu a suprana nant’à l’Homo-Erectus-ma-micca-sempre. U razzinu di i benevulenti hè in periculu di smarisce.

Una tragedia s’appronta pè i balli di paese è i filatelisti in cità.

 

 

Masai 14 02 14 U benevulente - Masai