Émissions Toutes les émissions

Masai

Masai: I cani, e donne, u Corsu

Cumu facenu à ride in Francese, e donne?

E donne ridenu, i cani abbaghjanu et la caravane passe . Sabbatu ghjè a ghjurnata di a donna. A mi pigliu in anticipu.

Perchè chì e donne parlanu francese à i cani ? L’ete rimarcata ancu voi nò ?

Pochi ghjorni fà, sentia ragiunà un coppiu pusatu à a terrazza d’un caffè. Avianu un cane ligatu. Biancu. In fatti, era una cagnola. Parlava ella à u maritu : « o Dumè ci vole chè no vacamu à vede à Risabetta à l’ospidale », poi girendusi versu u cane chì tirava nantu à a so ligaglia : « Princesse viens t’asseoir ». Di novu à  u maritu : «  Risabetta hè à l’ospidale da poi trè ghjorni è ùn simu ancu à andà… ».

-        «  È cosa hà ? », face u maritu.

-        « Elle a une descente d’organe . L’ hà detta u duttore Belkhacem ».

-        « Troppu troppu cannelloni. Si paga o cara Vanessa. Diceremu à Belkacem di metteli un bellu paghju di tracolle appicate à l’asciunghja, per fà ricullà a panza chì piglia ghjò ».

A moglia, Vanessa, dendu torna capu à u cane, azeza  « Pincesse si tu tires ancore je te creve  », poi à u maritu è à u cane à tempu : « o Dumè incù a salute di a ghjente ùn ci vole à ride. Pincesse tu es trop méchante. O Dumè, ma cosa averà issa cagnulaccia di merda. Bon tu as gagné, Princesse on s’en va . Veni o Dumè… ».

Dopu vi lagnate chì i cani ùn capiscanu chè u Francese è i carci in culu.

In u mentre ch’eo scrivu issa cronaca, tantu luntana di mè, ci hè una donna chì telefuneghja è ride. Parla è ride à u telefunu. Cun quale ella parla ùn la sò, ma parla è ride. In Francese. Ride in Francese. Hè difficiule à spiegà, ma ride in Francese. À u telefunu. Ella a le rire ostentatoire . Ride perchì a persona incù a quale ella parla, sappia ch’ella ride. In Francese. Issa risa dice : « senti cum’è tù mi faci ride. D’altronde ridu ». Bocchispalancata….

E donne parlanu Francese à i cani è ridenu à u telefunu, per fà sapè à i tippi chì l’alluzingheghjanu ch’elli sò spiritosi.

A risa hè in bocca à e donne chì dicenu di sì.

In tantu, sabbatu ghjè a ghjurnata di a donna. Femu chì u corsu sia a lingua di i cani è di a risa di e femine chì dicenu di sì à i tippi chì e struzzicanu à u telefunu.

 

 

Masai 04 03 14 I cani, e donne è u Corsu - Masai