Émissions Toutes les émissions

Masai

Masai: I grombuli di a Sumalia

A singularità d'ogni grombulu di a caspa sumaliana

Ghjera in Sumalia. A Somalie pè i Francorsi.  Sò andatu culandi à pruvà di smagrì. I Sumaliani, a sapete, sò magri magri. Purtantu a Sumalia, u so emblema naziunale hè u fisculu mariò. Andate à circà. Sò passatu per casu d’avanti à l’ospidale di a capitale. Finestre chjose, usciu serratu. In issu paese o sò tutti in salute o sò tutti morti, mi sò dettu. Ci era un fogliu scrittu puntarulatu nantu à l’usciu : « In casu ch’ellu ùn ci sia nimu è chè vo siate qualchissia, fate passà u malatu sottu à l’usciu ». Quessa hè stata a mo prima imagine.

Tutti i canti di issu paese, cumpostu di tribbù à a fame ch’ùn si ponu pate in pittura, volenu l’autonumia. U fondu puliticu di l’autonumismu sumalianu  si pò sintetizà in a celebre frase di u cugnatu di Lumumbà : « andate tutti à cacà ».

Un zinzicu di geopulitica microregiunale, avà. A u nordu ci hè a regione di u Somaliland.  Sò stati i primi à staccassi dichjarendusi indipendenti. À fiancu, più à levante, avemu u rughjone di u Puntland. Cum’ella a lascia intende u nome, ghjè chjucu chjucu u Puntland. In 98 i capitribbù Puntlandesi si sò detti autonomi. Quand’elli l’anu dumandatu perchè, anu rispostu : « è chì v’ariguarda ? ».

À tocca tocca incù u Puntland, avete u Galmudug. « Ancu noi, ancu noi » anu mughjatu e tribbù di u locu. È si so messe à fà ognuna ciò ch’ella vulia, dendu calci in corpu à ch’ùn capia è chjamendu issu modu d’urganisazione « totocalcio ». Vi ramentu chì a Somalia hè stata una culunnia Napulitana. À punente, truvate u Jubaland. I Jubalandinchi, più identitarii, anu spiegatu :  « vulemu esse autonomi chì noi simu neri, quandu l’altri sò neri neri ».  

Infine, per cumplicà tuttu, ci hè u casu di u Maakhir, trà u Somaliland è u Puntland. U Maakhir, ghjè una pianura desertica grande cum’è a Piazza di u Diamante. Ci soffia un ventu callu. Ùn nasce un filu d’erba. U Somaliland è u Puntland, si cuntrastanu per impatrunissi di u locu. In risposta, i quattru pastori, chì sò tuttu tuttu sanu sanu u populu Maakhirese, anu rimbliccatu : «  postu ch’ella hè cusì, dichjaremu ancu noi a nostra autonumia ».

Bonu, à a fine di u mio viaghju, dieteticu, à colpi di fisculi mariò smagritu ùn aghju tantu smagritu. < Ma aghju amparatu: a singularità d’ogni grombulu face a caspa.  

 

 

 

 

Masai 17 03 14 I grombuli di a Sumalia - Masai