Émissions Toutes les émissions

Masai

Masai: I metanodotti

Podcasts :

U monolocu di e cureghje perse

“Chì serà stata? Ùn la ti saperebbi dì. Mi pesa u stomacu, mi pesa u corpu, mi pesa tuttu. Aghju manghjatu u caprettu dumenica. Iè perchì, mi face Bartulumeo Sinibaldi, u maritu di Madama Sinibaldi, a mo vicina, ind’è noi si face sempre u pranzu di a dumenica. Ma, mi dice, principiu à dupità. In quant’à mè era più capra chè caprettu, chì e corne mi sò restate nantu à u stomacu. Allora a sapete, quand’è v’avete un paghju di corne in corpu (in più d’avelle in fronte), è chè vo ùn la ci fate a digerì, vi si sparghje un velu di malumore nant’à l’estru”.

Eo u fidighjava. Era azezu Bartulumeo. Cuntinuava u so monolocu.

“O seranu stati i coccò rose, seranu stati. Chì quella avia fattu i coccò rose per accumpagnà u caprettu. Ind’è seranu stati i coccò rose, seranu stati, micca e corne. A sentu in corpu l’usina chì travaglia. L’usina di pruduzione di metanu. Sò una centrale di pruduzione di metanu à mè solu. A l’avia detta à Angele : micca coccò rose o Angele. Ma aù. Quand’ella hà qualcosa in testa... Sì a mo moglia mi palesa à i Verdi Corsi, Dio ne liberi, mi ficcanu un metanodottu à l’ochju merlinu. Per aricuvarà u metanu di e mo cureghje. Le developpement durable, la croissance verte, a culugia alò.”

Ùn s’arrestava più di parlà Bartulumeo. Eo stava à sente chì in u so batalume nant’à e cureghje chì si perdenu, qualcosa di veru ci era.

Francescu Alfonsi è tutti quelli chì s’impegnanu pè u sviluppu duraticciu, ùn ci anu mai pensatu à quessa, à e cureghje di Bartulumeo Sinibaldi è di tutti i praticanti di a sanità di corpu - cum’ellu dice u pruverbiu: tromba di culu, sanità di corpu.

S’ella ci fusse una rete di metanodotti individuali, per aricoglie u metanu di tutte isse cureghje perse, e centrali eletriche di u Vaziu è di Luciana ùn averebbinu bisognu nè di Galsi nè d’altru restu. E cureghje di u Populu Corsu, basterebbinu à assicurà l’autonomia energetica.

Ringraziendu à quale, Ringraziendu à quale?

À Bartulumeo Sinibaldi è i coccò rose di a so moglia...

 

Masai: I metanodotti