Émissions Toutes les émissions

Masai

Masai: I sulstizii

Podcasts :

Ch'elli sterpinu l'Aztecchi è i Tutlecchi

 

Simu d’estate. Quasi d’inguernu. Entrimu in i tempu ch‘abbughjanu, trà i dui sulstizii.

Sò l’Aztecchi ch’anu inventatu i sulstizii, quellu di a fine di a luce,u scorsu 21 di ghjugnu è quellu di u bughju, di dicembre. Dopu, sò stati obbligati à inventà l’estate è l’inguernu è poi u calendaru.  Fatta quessa, anu inventatu u turismu per chì e duie stagioni ghjovinu à qualcosa.

Chì tippi l’Aztecchi, n’hè?

Per dì a verità, sò stati i Tultecchi à inventà u calendaru Azteccu. Ùn calendaru chì facia perde un tempu scemu à a ghjente. Dopu à ùn sò quanti calculi, anu decisu chì e settimane serianu di cinque ghjorni è i mesi di vinti. Pensate un pocu cum’ella pudia viaghjà. Prestu si sò avvisti chì u tempu filava, filava. Allora, infrungna chì mi ti infrugna, ficcavanu ghjorni in più à a scimesca in u calendaru, sperendu di chjappà u tempu chì curria più in furia chè elli. Ma pensate !..À a fine d’ogni ciclu di novantatrè anni, eranu crepati in corpu. È s’ella ùn ci era chè quessa, meza bastunata !  Ci vole à sente i nomi ch’elli anu datu à i ghjorni è à i mesi. Invece di chjamalli cum’è tuttu u mondu luni, marti o mercuri, anu preferitu eecatl, coatl, mazatl, è tira avanti è via da incruchjassi a lingua. I mesi, ùn eranu micca ghjennaghju, ferraghju o marzu, innò, ma atlcoualco, etzalqualitzli, hueiracuhilhuitl. Ancu di grazia, sò stati cunquistati, prima ch’ella ùn li venga a brama d’inventà a cunsunatura capunenzu.

Fernando Cortés è Pizarro Altamirano, i Spagnoli chì i cunquistonu, funu in fatti i primi turisti. Eranu attirati assai da l’estate chì venia d’esse creatu. Eccu cum’ellu s’hè inventatu u turismu, cum’una cunsequenza dramatica di l’estate. L’Aztecchi si ne sò fragati e cuntribuzioni, ma era troppu tardi.

Da poi tandu, i Cortés è i Pizarro di meza età, grassi è stanchi, francatu ch’elli anu u sulstiziu di l’estate, si mettenu tutti in short, si lascianu sculiscià in falata è si rivoccanu in mare. Tristu cuntenutu di i cundutti di a nostra civiltà.

 

 

Masai 01 07 14 I sulstizii - Masai