Émissions Toutes les émissions

Masai

masai: I viaghji...

Podcasts :

L'Inglese hè tradimentosu...

 

Oghje a marea hè bassa. Pocu laziu. M’aghju da lascià andà. Face prò di lasciassi andà à dì duie cianfule. In più mi paganu. È poi a sò, voi preferite e cunnerie. À divvila franca ancu eo.

A mè piacenu i viaghji. I viaghji cum’elli mi piacenu. U guerrieru Masai n’hà fattu nepochi, vi ricurdate. Emu giratu u mondu, inseme. V’aghju portatu in Tinfù, a capitale di u Buthan à vede e Buthane. Donne terribbili. V’aghju purtatu nantu à a sponda di u lagu Tanganikà in cumpagnia di issi disgraziati di Stanley è Livingstone, ch’anu passatu quallà u brevettu culuniale. V’aghju portatu in Mungulia, duve u Yack è e donne si cunfondenu. Anu listessi peli. È ùn si ferma quì. Ùn emu finitu po di girà u mondu.

A mè piacenu i viaghji. Ma mi piacenu ancu i viaghji di l’altri, quand’elli i mi contanu.

Ghjustamente, l’altru ghjornu aghju infattatu un amicu di u paese di Cugnoli-l’Appicciu (supranu), Marcandriapetrusimone.

Era statu in Inghilterra. In Londra. Era fieru... “Sò statu in Londra”, dicia à tutti.

“È allora, Londra, cumu l’ai trova a cità? Ti si campatu n’hè? Pasquale Paoli, Winchester Cathedral, Eleanor Rigby, plum pudding à crepera, the horse guards, a ticket to ride nant’à l’autobussi à dui piani. Ti si campatu n’hè?”.

 

Quellu mi risponde: “Bellissima cità, quessa pò si. Ma sò strani l’Inglesi, ùn ci aghju capitu un cavulu. I carri alti tutti rossi, i chjamanu “bass”, e traverse larghe larghe e chjamanu  “stritt”, quand’ellu face u fretu dicenu ch’ellu hè “cald”, u cavallu u chjamanu “ors” è e femine “uomen”. Ti poi dupità chì eo, femine chì si dicenu “uomen” ùn ne toccu.  

Una sera sò surtitu cù una ch’ùn avia l’aria d’esse “uomen”. L’aghju piaciutu è à a fine di a serata mi dice: “lav mi”.

“È tu ch’ai dettu?”, l’aghju fattu...

“Ch’aghju dettu? Lavati à di per tè o cughjò”....

“L’indumane mi ne sò vultatu in Cugnoli-l’Appicciu supranu. Omancu custì e donne sò omi cum’è l’altri.”

Masai 21 02 14 In londra...