Émissions Toutes les émissions

Masai

Masai: L'acellucciu ind'è a merda

Podcasts :

Un stalvatoghju Chinese chì vene da a Maremma Tuscana

Eccu un Masai chì m’accunsente di porghje un salutu à a manata d’auditori di RFCM in a Maremma Tuscana. Di fronte à Bastia. Frà quessi ci hè l’amicu Claudiu Marinari, ch’ùn mancherà di stà à sente issa cronaca, postu ch’ellu hè ellu chì mi n’hà datu l’idea. Ghjè un stalvatoghju inventatu in i tempi, da un filosufu Chinese scunnisciutu. Ma tutti issi Chinesi, ùn avianu nunda à fà ? Casa, moglia, figlioli, travagliu, ùn avianu, per avè u tempu di pensà tantu ? È poi, dimi tù à cosa ghjova, si quattru mila anni dopu u mondu cunnosce i to scritti, ma s’hè scurdatu di u to nome ? Ti n’enfutti ? Ai ragiò. Eo mi n’enfuttu ancu di più.

Bonu, issa strufetta di u Chinese di Piumbinu ...

 

Un acellucciu, micca lisciu è dunque nancu prontu à vulà, cascò da u so nidu. Tuttu adduluritu si messe à pigulà, à lagnassi, chì li sentia tuttu è avia u fretu. Passò una ghjandaghja. « Passò una ghjandaghja… ». Da quì à vint’anni piu nisunu capiscerà issa frase. Micca chì, si spieca nò, u passatu landanu ? Più landanu chè a China ùn ci hè… Passò dunque una ghjandaghja chì u si pigliò in pietà. Dilicata dilicata, chjappò l’acellucciu di bizzicu, u pisò è andò à ponelu in u cacatu vaccinu frescu frescu, dunque callu callu. Per una bella stonda si truvò bè, chì ghjera megliu custì chè prima. Ma pianu pianu si rese contu di u tanfu, una puzza terribbile chì criscia à tempu ch’ellu ghjalava u cacatu. È i pigulimi lagnosi riprincipionu, più forti. Forti tantu chì una volpe l’intese. S’avvicinò, è cù a so faccetta gentile, pigliò l’acellucciu di bocca, u tirò fora da a merda, poi, glup ! U si manghjò.

Di a murale – chinese- di issa strufetta maremmana, vi ne dupitate : micca sempre, à chì ti mette ind’è a merda ti vole male è ùn hè sigura sigura chì unu chì ti ci toglie, ti voglia bè.

Una cosa hè certa, da una banda è da l’altra di u Tirreniu: quand’è tù sì ind’è a merda, ùn ne fà tanta pubblicità.

Masai : L'acellucciu ind'è a merda