Émissions Toutes les émissions

Masai: L'inglesi ridenu

U stervatoghju di u 10 Downing Street

L’Inglesi sò i più intelligenti. Anu inventatu tuttu. Ancu l’estru umuristicu. Tuttu l’umurismu Inglese hè in issa strufetta chì i primi ministri contanu à l’ondeci Downing Street, in Londra.

A Regina Risabetta hà invitatu à Sarkozy, in una cena officiale, qualchì annu fà, quand’ellu era presidente. Sò in u palazzu di Buckingham, u Presidente Francese sbraccittendu è nervosu era smaravigliatu. Dice à a Regina:

    -    Ma cumu fate à esse sempre à mezu à ghjente intelligenti. Sò sprupositi.

Risabetta risponde:

-         Ùn hè tantu difficiule. A mo ghjente a mettu sempre in prova, ancu à l’ispensata. Vogliu esse certa  chì a so intelligenza hè sempre acuta.

È Niculaiu : “è cumu fate, cumu fate ?”. A Regina inguanta u telefunu : “Aspettate, v’aghju da fà vede....”. È chjama quellu chì era primu ministru à l’epica, Gordon Brown.

    -    Hello Gordon..

    -     Hello Her Majesty…

    -   Dear Gordon, this is an intelligence quiz. Are you ready ? 

    -   Yes My Queen.

             -    Allora rispundite à issa dumanda: ghjè u figliolu di a vostra mamma è di u vostru babbu ma ùn hè nè u vostru fratellu nè a vostra surella. Quale hè?

   -    Sò eo...

    -    Bravu. Thanks Gordon.

A Regina appicca u telefunu, fideghja à Sarkozy è li dice: “allora ete capitu?”.

Capitu po avia capitu. Ghjuntu in Parigi à frambattuta, chjama u primu ministru di tandu, Fillon,.

-      Bonjour François, c'est Nicolas ! T’aghju da fà una dumanda. Vogliu una risposta subbitu, n’hè ?

-     Và bè…

-      Ghjè u figliolu di a ta mamma è di u to babbu, ma ùn hè nè u to fratellu nè a to surella. Quale hè?

-     O sgiò Presidente, aghju nutatu. Mi rinsegnu è vi chjamu.

Fillon dà capu à Copé, chì dà capu à Bertrand chì dà capu à un altru minitru.. A risposta nimu a cunnosce. Finisce chì và à sente à Jean Louis Debré.

-         Dimi, ùn sò ciò chì li piglia à l’altru, m’hà fattu una dumanda chì ohimè. Mi voli aiutà ?

-         È và bè. Sentimu...

-         Ghjè u figliolu di a ta mamma è di u to babbu ma ùn hè nè u to fratellu nè a to surella. Quale hè?

-         Sò eo...

-         An..... Ti ringraziu.

Fillon chjama subbitu à Sarkozy.

-         Presidente, aghju a risposta..

-         Fà ch’eo senta...

-         Ghjè u figliolu di a vostra mamma, di u vostru babbu, ma ùn hè nè u vostru fratellu nè a vostra surella. Quale hè? Ghjè Jean Louis Debré...

-         Hai persu ! Ghjè Gordon Brown !

È si campanu di rise, l’inglesi, quand’elli si dicenu issa strufetta. Ancu a Regina. Serebbi stata a prima à cuntalla.....

 

Masai 07 03 14 L'umurismu Inglese - Masai

Partager sur :