Émissions Toutes les émissions

Masai

Masai: Le figatel'

Podcasts :

Ch'elli u si faccianu cullà...

Allora cusì ùn si pò più  manghjà figatellu crudu senza mettesi in periculu di chjappà l’epatita E. Digià, ci avianu pruibitu u casgiu, per parassi da a listeria.

L’ove, chì danu a salmunella

A carne, ch’attacca u cancaru

E bietule, a malinconia

L’acqua d’Orezza, ch’addebulisce u core

U zuccheru, ch’inzepisce u sangue

U pesciu, pienu di i puzzicumi di a pulluzione marina.

A ferina pisticcina, chì rende pazzu.

Ci volenu fà more di fame, alò.

Ma quella di u figatellu, ùn la ci pudemu ingolle, nè cotta nè cruda.

Ghjè una agressione contru à a parte a più magra di u Populu Corsu, i pruduttori di salumeria.

Viderete chì a Cumissione Eurupea, chì dà capu à tuttu ciò chì ci cumplicheghja a vita, lasciendu corre e cosi impurtanti, hà da pruibbì a pruduzione è u cunsumu di figatellu. Ne nascerà un traficu sott’à u mantellu, l’inguernu, sott’à u tee shirt d’estate. U cunsumu à l’appiattu di u figatellu, cum’è quellu di a farina pisticcina, serà u modu di trasgressione u più spartu, ind’è a giuventù.

Micca chì, una suluzione ci seria, per ùn areghje a pruduzione. Si puderia, per u fattu, prupone à quelli chì volenu attaccà a paura à l’amatori di figatellu, d’aduprallu  d’una manera ch’ùn li pò mette in periculu di chjappà l’epatita : cunsumallu ar’ di sottu. Fassilu cullà à quellu locu, le figatel’. Chì a Cummissione Eurupea l’hà datu ufficialmente issu nome.

Cusì, tutti seranu cuntenti : quelli chì si piglieranu un bellu pruduttu nustrale in l’ochju merlinu. È a parte a più magra di u Populu Corsu chì puderà cuntinuà à pruduce.

A videte ch’ùn vale a pene d’annerbassi.

 

Masai: Le figatel'