Émissions Toutes les émissions

Masai

Masai : A lezzione di pulitica

Podcasts :

U mondu ùn cambia di vasu: hè sempre in a merda...

Oghje simu in falata. U Masai si lascia andà. In Francese, issa stonda quand’omu allena i freni per dassi una cria d’oziu si chjama “u riposu di u guerrieru”. U guerrieri Masai si dà à a facilità.

Per cessà di parlà à a terza persona, chì quessa hè una malatia chì pò minà in capu à l’ispensata à ognunu di noi, vi prupongu una interpretazione metaforica d’un stalvatoghju à bastanza classicu. Vogliu intende chì une pochi u cunnoscenu.

Vistu ch’elle piacenu e cosi sappiute, ci era una volta un zitellettu chì dete capu à u so babbu è li disse: “o bà, a pulitica, cosa hè?”. U babbu si grattò u tupezzu, pensendu, “chì sega, ùn hà trovu chè à mè per quesse e dumande...”. Dopu à avè pensatu un pocu, li disse:”Ti pigliu un esempiu. Per u fattu, eo chì travagliu è portu i solli in casa, sò u capitalistu. A to mamma chì i rege, risparmiandu è spendendu quand’ellu ci vole, hè u guvernu. A donna di e pulizie, ghjè a classa operaia, tù chì sì grandettu è ai dirittu à fà sente a to voce, sì u populu è u futuru hè a to surella à pena nata. Hai capitu u mo figliolu?”. “Iè o bà”, fece u criampulu. È si n’andò à dorme.

Ma à duie ora di mane, a surella à pena nata principiò à pianghje. U zitellu si rizzò è andò à chere aiutu. Prima cercò à babbu ma ùn lu truvò. Scuzzulò a mamma in lettu, ma quella insunnulita u mandò à spassu. Restava a donna di e pulizie, ma a truvò in lettu cù u babbu.

Ista volta u si grattò ellu, u tupezzu, mettendusi à riflette ricurdendusi di a spiegazione di u babbu à prupositu di a pulitica. Filò vicinu à u veculu di a surelluccia, a guardò, li pigliò a manuccia per calmalla è li disse: “stà à sente a mo surella, avà aghju capitu ciò ch’ella hè a pulitica: i capitalisti si futtenu a classa operaia, u guvernu dorme, u populu ùn ascolta à nisunu è u futuru hè ind’è a merda”.

In issa stonde di tensioni suciali, ci vole forse à ricurdassine.

 

Masai : A lezzione di pulitica