Émissions Toutes les émissions

Masai

masai: Madama Sinibaldi mi nega u mottu

Podcasts :

Dice ch'eo parlu troppu d'ella....

Un mazzulu di ghjunchiglie, l’aghju datu à madama Sinibaldi. Mi nigava u mottu. Li vulia dà issi fiori per ch’ella ùn mi faccia più u musu. Quand’ella mi crocia allonga u pappatoghju è mi gira u capu.

A sò perchè. A m’hà detta Madama Venemicacci. Venemicacci hè a casata di u so van’ di maritu. Ella di giuvanotta si chjama Istipruni. Nantu à u so usciu hà messu una placchetta di ramu inchjudata, incù u so nome sanu sanu. Marie-Elisabeth Venemicacci-Istipruni.  Face a so cuntessa, viaghja sticchita. Ma hè bravaccia, attenti. Passa l’inguernu in l’appartementu sottu à ind’è mè è di veranu si ne colla in u so paese di Cugnoli-l’Appicciu. Madama Sinibaldi ùn ne pò sente a puzza d’ella. Per una cosa chì normalmente ùn averia d’avè tenta impurtanza:  mette i tacchi alti è in casa ùn i si caccia mai mai. Solu per dorme. Anghjula Sinibaldi, à u pianu suttanu, sente e talurcate di i passi di a so vicina di sopra. Tà, tà, tà, tà.... Ùn s’areghje mai di viaghjà. Dice ch’ella hà u focu à u culu: pass’è veni, pass’è veni. Quand’elle s’infattanu pè e scale si letecanu. Attacca Sinibaldi. A chjama madama Venemicacci-u-focu-à-u-culu. Si mette d’avanti à ella è li cappia à brusgia pelu “ta, ta ta ta i to tacchi alti in vechjaia l’ochji bleu ! Sò obligata à mette les boules “qui c’est”, altrimente ùn ci hè riposu”... L’altra fredda fredda è bocchi stretta, li scalba, guardendula in l’ochji cun dispressu: “Micca “qui c’est” o Sinibà, Quiès. Les boules Quiès, micca “les boules qui c’est”.

A m’hà detta a cuntessa perch’ella mi face u musu, Madama Sinibaldi. Dice ch’eo parlu troppu d’ella, ch’eo a ghjocu à a risa a a radiu, ch’eo facciu u mo pretensiunutu perch’eo parlu à u postu.  Allora mi toglie u mottu.

Eri, ghjera in purtone incù u so sacchettu di e cumissioni,  ghjustu quand’eo surtia da l’escensore. Mi so dettu “aiò aiò, li feraghju mottu eo...”. È li dicu: “O Sinibà, e mettite sempre les Boules Qui c’est ?”. “Iè, mi face, è peccatu ch’eo ùn l’abbia oghje. Ti pregu d’un addirizzami più a parulla, tantu chì u mio estru ùn l’accunsenterà...”.

“Mi pregate, mi pregate, l’aghju rispostu... Hè vera chì Dio esiste, ma ùn so micca eo...”

Hè chjuccatu u so rimbeccu cum’una staffilata:  ”Chè tu varga errante cume a cascia di Magumettu !...".

È m’hà fattu e corne.

Ghjè tandu ch’eo l’aghju datu u mazzulu di ghjunchiglie. Gialle.

Masai 10 03 14 Sinibaldi mi nega u mottu - Masai