Toutes les émissions

Masai

image par défaut

Masai: Marcangeli, u ritornu

Simu tutti marron

Rivengu da a Sicilia è di cosa m’avvecu ? Anu elettu à Marcangeli in Aiacciu.

Mi scuserete, ma eo dicu Marcangeli.

L’elettori anu cunfermatu a sentenza di marzu passatu, rendendu ancu più chjara a fine pulitica aiaccina di Simone Renucci. Rimarcate chì, l’aviamu vista vene da un pezzu. Ùn hè d’oghje ch’ellu ci vulia à prestassi à un aghjurnamentu puliticu.

Si sente dì chì, finalmente, a Cità Imperiale volta in a so cultura di diritta. Eo ùn ci credu. Ghjè cum’è sè a cultura pulitica d’una pupulazione fusse stanterata pè u sempre in un campu o in un altru, senza chì mai u prugressu a possa fà mutà. Sè vo m’accunsentite un parè chè vo ùn site obbligati di scumparte. I conti parenu à bastanza chjari. Simone ùn hè statu capace di furmà una mossa nova intornu à ellu. Lurenzu incù a so giuventù hà sappiutu cummunicà, puru sì, persunalmente, i motti  “simu tutti Laurent” è “Plus belle la ville” , à mè m’averebbinu piuttostu fattu fughje. Và à caratteri.

Finalmente, Corsica Libera ci sorte à bè. Si facenu presenti in a vita pulitica aiaccina incù una imagine pusitiva d’apertura, di pruiezzione nant’à l’avvene. S’ellu era quessu u so calculu, avvicinendusi da i cumunisti, mi pare piuttostu riesciutu. L’osse in gola i si piglianu quelli ch’ùn sò presenti, postu ch’elli smariscenu. Infine, videremu.

Ùn sò perchè, quand’ellu mi prudisce l’avvene, ghjè l’ochju merlinu ch’eo mi grattu.

Iè, vi dicia ch’eo voltu da a Sicilia. Eramu in Palermu per Mediterradio, incù Petruluigi Alessandri. Simu andati à vede u celebre marcatu di Ballarò. Ne vulete voi bundenza di prudutti lucali à bon’ pattu ? Divizia di legumi, frutta, carne, pesciu, à prezzi da cascà secchi...

 Dumane vu ne parlu.

Masai: Marcangeli, u ritornu