Émissions Toutes les émissions

Masai: Maria Bronzini è e reti suciali

Scurdassi ch'omu ingrassa nantu à Facebook

Maria Bronzini cura u so pesu. Hà una paura scema d’ingrassà è batte e sette chjappelle per truvà una soluzione da firmassi snella, impettendu a natura di fà a so opera.

Un pocu cum’è l’arburi chì crescenu, ogni annu ci areca una striscia di polpa. Chì ci si pò fà? O s’accetta issa fatalità naturale, o si ricusa. Ricusà, intende ch’omu s’impegni in una battaglia cutidiana contru à a ciccia. Ghjè una guerra terribbile contru à a natura. Quand’omu sà chì, in un modu o in un altru, a natura vince sempre, à cosa ghjova? Eo aghju una soluzione contru à u pesu chì cresce: scurdassine, pensà à altru. Per quessa, qualcosa aiuta, qualcosa chì vi face entre in una sfera di dimentichera. Qualcosa chì vi mette fora di u mondu, o piuttostu in un mondu virtuale. Virtuale, vale à dì ch’ellu ùn esiste issu mondu, postu chì materiale ùn hè. Ma reale quantunque, chì ci hè ghjente chì ci campa, chì ci esprime sintimi è entre in inter-relazione. Di chì mondu parlu? Di e reti suciali: Facebook, Twiter è altru...

Ghjè a scelta di Maria Bronzini è hà ragiò. In facebook u pesu ùn conta più, site solu un spiritu. S’ella vi piace à esse magra è alta, bionda in una vittura rossa, in Facebook pudete. È poi, chì vita in issu mondu ! Mi ci sò spassighjatu, postu chì, ancu eo, aghju sceltu a soluzione di Maria Bronzini, per esse giovanu, magru è americanu.

Ci hè duie cose istu pocu chì correnu nantu à a tela: a cuppa di u mondu di futebol chì sfoca tutti i naziunalismi è l’inghjulie suciali è una spezia di ghjocu. A ghjente deve mette nantu à Facebook una fottò di sè stessu zitellucciu, criaturu, o allora deve pagà u ristorante à tutti. Ma vi rendite contu, chì marcatu quessu ! O vi date à manghjà à tutti, voi quand’è vo erete ciucciu, o vi ruvinate in ripasti in osteria.

È cosa accade à issa corcia di Maria chì và nantu à Facebook per figurassi ch’ella smagrisce? Accade chì ancu in issu mondu virtuale, ùn ci n’hè chè incù u manghjà.  O si manghjanu trà d’elli in un cannibalismu cullettivu o si techjanu inseme in una pizzeria.

Mancu in u mondu virtuale di e reti suciali, pudete campà  cum’ella vi pare. Ci serà sempre un gruppu di rompicuglioni chì vu rumperà u dighjunu...

Masai: Maria Bronzini è e reti suciali

Partager sur :