Émissions Toutes les émissions

Masai

Masai: Mi ricordu

Podcasts :

Mi ricordu di l'à vene...

Mi ricordu di l’odore di a frasca, d’istatina sott’à i frascati

Mi ricordu di l’Ochju di u Serpu, a surgente chì mi rinfriscava

Mi ricordu di a voce di Mustaccione è di Matteone

Mi ricordu chì Ugu cantava a mane à bon’ ora à cavallu à a mula andendu à u Sambucu

Mi ricordu di i mio passi à a funtana à empie a giaretta

Mi ricordu di l’arrivu à l’alba nant’à u campu di fiera di u Prunu cun babbu per istallà u bancu

Mi ricordu di u pane è u cumpane spartutu incù Moracchini u pippaiu di e Valli d’Orezza in fiera di Santa Maria

Mi ricordu ch’ùn emu mai sappiutu cantà a paghjella ma ch’o sapiamu arruste a panzetta

Mi ricordu di e nostre corse in stolu à fà cincinà i chjerchi

Mi ricordu di quand’ellu ci era sempre a terra nantu à i stradoni è e rondine

Mi ricordu di  quand’eo turcia a piova per innacquà l’ortu di i Pianelli

Mi ricordu di Ceccecca chì a si cacciava cun mè perch’eo mi chjamava cum’è a muntagna chì facia nivà

Mi ricordu chì l’America principiava à a Croce u paese dui chilometri più in sù

Mi ricordu di Ghjuvanfrancescu chì tartagliulava è ghjucava goal

Mi ricordu di e terribbili partite di ciccia chì rumpianu e reni

Mi ricordu chì si duvia dì “secula” prima di cascà sott’à u pesu

Mi ricordu di i catelli lurchi di i scannaboi di a veccia di a nocca di i buletri di Duminichichja a bancalarichja

Mi ricordu di a battaglia di Verdun mille volti rifata incù quelli chì a si franconu

Mi ricordu di u misteru di l’appartenenza à a Francia  irrisoltu in a mo mente di zitellettu

Mi ricordu di ciò ch’eo mi tengu per mè è chì mi custruisce

 

Masai : Mi ricordu