Émissions Toutes les émissions

Masai: A mosca

Sudumisazione d'una mosca.

Tantu ch’ellu ci serà vetri, e mosche si sciarberanu nantu.

U vetru si ne impippa, a mosca si n’enfutte.

Incumunicabbilità finita, trà u vetru è a mosca.

U vetru, si capisce, ghjè un vetru. Ma a mosca ? Ghjè un essere umanu cum’è tè. Purtantu, senza stancà, generazioni dopu à generazioni, si frazanu à incappà contru à u vetru, fenduci capì chì, nenzu crepà chè di cambià e so abitutini.

Ma crepanu. Dopu à avè fattu e so ove. È a muscuccia nova, à pena nata, vene à bufuna versu a finestra, trova prestu u vetru è …capate. A mosca nova, s’assumiglia tale è quale à a mosca vechja. Hà ripigliatu a so battaglia contru à u vetru, cun l’abnegazione di i sullati à Verdun.

Sò sprupositi, chì ne dite ? Assumigliassu tantu à a so mamma, à a so mammone, à a so archimammone à a so purarchimammone, ghjè un cultu di l’antenati più forte, perfettu di più, chè in Corsica i primi tempi di i Riacquistu. Ghjuntu u veranu, in l’ardore di a ghjunventù, eccu e mosche nove chì si tiranu à fondu contru a u vetru u più vicinu, incù tutta a putenza di e so alette fresce fresche, per mette in prova incù intusiasimu, un nimicu ch’ella ùn pò capì.

È bè, o ghjente, i baulli si riconnoscenu à issa ostinazione d’insettu. Listessu cultu di l’antenati : si ripruducenu tale è quali listessi listessi in secula seculorum, senza bisognu di a minima matamorfusi per adattassi  à u circondu. I baulli sò un dispettu per Darwin.

Anu listessa faccia, listessa trinca, ùn li pudete distingue. Disgraziati à chì ne cunnosce unu, serà obbligatu di salutalli tutti. I baulli anu a fede di a mosca chì si fracella contru à u vetru, persuasa chì, s’ella fiasca, ghjè perch’ella ùn ne face à bastanza.

I baulli s’intestanu à restà ciò ch’elli sò, per manchenza assuluta d’eruisimu, chì l’eroi sò piuttostu quelli chì riscenu à scappà da a so natura.

U baullu, ghjè a versione corsa di u connu. U connu ch’ùn hè tantu connu à pensalla bè. Sà una cosa, una sola, ma quessa a sà : a so forza ghjè a quantità. S’ellu cambia, a perde…

 

 

 

Masai 13 02 14 A mosca - Masai

Partager sur :