Émissions Toutes les émissions

Masai: A muraglietta

L'utupia di a muraglietta

Fà o disfà e muragliette… Ghjè finalmente quessa, a realità municipale.

E squatre nove di e merrie, si sò fatte eleghje di marzu nant’à prugrama da cambià u mondu. Ma una realità li s’impone, testarda, spietata, quella di e muragliette, chì li taglia e schinche.

Perchè?  

Ind’è perchè chì, in Corsica, u cunsigliu municipale, da sempre, hè elettu per fà e muragliette, micca per altru. O disfalle. Segondu u ghjudiziu di l’elettori. Ma vi rendite contu di l’impurtenza di e muragliette in a nostra cultura ? Da i fondi i più landani, bughji e nebbiacosi di u tempu, a  muraglietta, ghjè u pusatoghju da nant’à u quale tuttu si decide. Ghjè u forum di a ghjente pusata, chì tira à palle rosse nantu à l’altra ghjente, quella chì s’hè sempre aritta. A muraglietta, ghjè ancu u locu di e delizie, duv’elli si stracquanu i sfaccendati sempre giovani, debbuli di cumpassione, sottumessi à a generosità municipale, à colpi di RMI o altre limosini. È à i quali di tantu in tantu, prudisce a Testa Mora. A muraglietta, infine, ghjè u pusatoghju di u giurnalistu, chì fideghje a a vita, quand’elli ci si vede...

Allora si capisce, à u primu prublema di muraglietta, a realità s’abbate nant’à e spalle di l’eletta, fresca e sana cum’è a tramuntana, è si sparghje, tale l’ale di u mulinu, nant’à l’ombra purtata di Don Quichotte.

È purtantu...

A storia ghjudicherà quelli ch’anu avutu u curagiu di rompe e muragliette, nant’à e quali dormenu ancu elli Don Quichotte è u so cumpagnu Sancho Pança. È cun elli i sogni. È in corpu à elli, l’utupia bastarda è piena di suchju, nantu a quale tutti simu insitati.

Pudete campà, voi, in un mondu senza muragliette?

Masai: A muraglietta

Partager sur :