Émissions Toutes les émissions

Masai

Masai: A paura in aviò

Podcasts :

Ghjè issa seca di Jeannot, u so maritu, chì l'hà scunvita di piglià l'aviò...

Quand’ella hà vistu u stagnu di Chjurlinu chì s’alluntavana sottu à ella, Madama Sinibaldi hà strintu e so mani nant’à i guditoghji di u futtogliu. Sentia e perle di sudore spuntalli à e funtanelle. Ma      dama Sinibaldi hà a paura in aviò. Ùn ci vulia andà à vede a so figliola in Marseglia. Ùn ci vulia andà, ùn ci vulia andà. Hè statu a seca di u so maritu à insiste, Jeannot, chì vulia esse tranquilla qualchì ghjornu, vulia.

Più s’avvicinava u ghjornu di a partenza è più si dicia ch’ella era stata scema d’ùn piglià u battellu. Una traversata in battellu sò vacanze. Un volu in aviò, ghjè mettesi inutilmente in periculu di morte. Ci vole à esse scemi, sì. Ella, Angele, ùn ci hà nunda à chì fà à decemila metri d’altitutine, incù u viotu sott’à i pedi, chì a minima panna di mutore vi sfracellate in terra cum’una pisticcina. Ch’ellu crepe cum’una ballotta u curnutu di Jeannot, ch’hà insistutu tantu per ch’ella vaghe in aviò. È ella, baulla, l’hà statu à sente. Baulla sì... Tantu ch’ella era luntana da u viaghju, andava, ch’ùn ci pensava. Ma dopu, a paura li criscia in corpu à misura chì u volu s’avvicinava.

U bigliettu era pagatu, ùn ci era Cristu à fà.

Hà respiratu bè. U duttore Belkhacem a l’hà detta: per calmassi ci vole à ispirà, espirà, ispirà, espira. L’hè venuta a capaghjina, cum’è quand’ella beie u muscatu. Hà decisu di  mubbilizà u so cerbellu nant’à una faccenda, per sviallu da a paura. Hà fattu falà a tavuletta, hà piecatu in quattru u Corse Matin è hà datu capu à u contu resu di l’Assise. À pena letta a prima frase, ci hè vulsuta ch’ella a rileghje. È leghji è leghji, ma «deux affaires jugées en premiere instance à Ajaccio, devant les assises de la Haute Corse à Bastia »,  ùn capia ciò ch’ella vulia dì a frase. Era cum’è Chinese.

...Mì chì sò passati i dui minuti.

Dumane vi contu a fine di u viaghju.

Masai 10 03 15 A paura in aviò - Masai