Émissions Toutes les émissions

Masai: A paura in aviò 2

Ci vulerà chì Jeannot s'accupe di Clitiss in casu di qualcosa...

I decemila metri di viotu sottu à u giurnale li tuglianu ogni intendimentu à Madama Sinibaldi.

Vi ricurdate, eri?

Pruvava à leghje u so Corse Matin in aviò, ma a paura li bluccava u cervellu. Ghjè statu issa rupaccia di Jeannot, u so maritu, à furzalla à piglià l’aviò per andà in Marseglia à vede a figliola. È avà chì vulava, si ne pentia. Ùn la ci facia à leghje u giurnale, ùn capia più u Francese nè nisuna altra lingua. “Ma issi pazzi d’avanti chì parlanu, chì ridenu, chì s’interpelleghjanu, paura di more ùn n’averanu? Seranu drugati...”, si dicia azeza. L’avia letta nant’à Selection du Reader’s Digest, i cundannati à morte sò drugati. Pensava à Jeannot. “S’eo cascu, falgu in mare è mai più mi ritrovanu. I pesci mi s’anu da manghjà è Jeannot chì li piace u pescu serà capace à manghjassi un pezzu di mè senza accorghjesine. Iss’abruttitu di Jeannot chì tuttu hè  colpa soia”. Angele vulia esse interrata in Cugnoli-l’Appicciu, vicinu à i soi, è micca fà da merenda pè i mazzerdi.  Hà ripruvatu à leghje u giurnale. « Deux affaires jugées en première instance à Ajaccio, devant les assises de la Haute Corse à Bastia ». Aù, l’hà letta è riletta vinti volti issa frase. Ghjera Chinese.

Quandu l’aviò s’hè messu à falà, hà ficcatu e so unghje nant’à i guditoghji di u futtogliu. Hà inspiratu, espiratu, inspiratu, espiratu, in furia in furia pensendu à u contu resu di a catastrufe, u lindumane nant’à Corse Matin. “Ci vulerà chì Jeannot s’accupe bè di Clitiss, u gattu”. L’avia chjamatu  Clitiss, cum’è Clitiss Wood. Hè scema di l’ispettore Harry. “Chì vita di merda. Hè vera chì ghjè una vita di merda, ma peccatu ch’ella finisca cusì”.

Disordine in testa. Musculi agrancati da a paura.

È poi hà vistu a terra vicina, vicina, vicina. Più s’avvivinava è più andava bè. Hà cessatu di respirà-inspirà. E mani anu cappiatu u futtogliu.  In casu d’accidente, avà,  si serebbi rotta un anca, micca di più. Cosa hè una gamba rotta ?

Quandu e rotule anu toccu a pista, s’hà tirata una peta.

 

Masai 11 03 15 A paura in aviò 2 - Masai

Partager sur :