Toutes les émissions

Masai

Masai: pruvà di capì

Esse pagatu par capisce è ùn capì....

Si prova di capì. Si cerca à capì. Quant’hè ch’eo provu di capì. Mariu Muraccioli, chì presenta u nutiziale corsu nant’à RCFM, dinù ellu prova di capì. Ma hè cum’è mè. Volta è gira è volta è gira è ùn ci si capisce un acca. È dura da poi …. A vi dicu da poi quandu : da poi ch’eo sò entratu à a radiu è ch’elli mi pacanu (caru) per capì,  per voi. Per capì « à a vostra piazza », s’eo a vulesse dì in corsu currendu, quellu chè vo parlate voi. Voi ch’ùn pudete capì.  È spicula chì mi ti spicula da poi e trentine di l’anni, incù l’intenzione di spiecavi à voi cum’elle vanu e cosi, ma aù, più u tempu corre è più hè bughju è ùn ci si vede. Allora cun Mariu Muraccioli certe volti ci dumandemu sì quelli chì ci paganu per capì ùn frazanu micca i so solli.

Micca chì, hè forse megliu cusì, chì nisunu capisca,  nè voi chì cungenitalmente ùn pudete, ne noi chì intelletualmente ùn la ci femu. Allora,  Mariu, chì riflette lu corciu, mi dice : «è s’elli pruvessinu di capì da per elli ? L’auditori di RCFM anu quantunque quasi tutti un cerbellu ». Allora li rispondu : «iè và bè, ma s’elli principianu à pruvà di capì da per elli, perdimu u nostru travagliu ». Peghju, l’iduli, di e quali s’ereghjenu e statue nant’à i nostri piazzali, è chì ci anu fattu ciò chè no simu, serebbinu in periculu d’esse abbattute. L’ete vista à a televisione quandu a statua di Ceucescu s’abbatte in terra, tirata à l’inghjò da e fune di quelli chì li s’hè parsu d’avè capitu.

Iè iè iè iè… Mi dumandu quandu capisceremu. Ma emu a cuscenza tranquilla Mariu è eo. Pruvatu averemu pruvatu. À capì. Puderanu dì di noi : anu pruvatu à capì, ma ùn la ci anu fatta. Averemu pruvatu.

È poi, è poi, hè ghjunta quella matina quandu Mariu mi face : « a sai una cosa ? Mi dumandu s’ellu ci hè qualcosa à capì ». Allora l’aghju dettu :  « ma tandu emu capitu ! ».

Emu capitu o Mariu. Emu capitu ch’ùn ci hè nunda à capì. Era ora.

Mi dumandu sì certe volti issa cronaca ùn hè micca una scuccuneria.

 

Masai 03 pruvà di capì