Émissions Toutes les émissions

Masai

Masai: A ritirata

Podcasts :

Iè ma, ùn tiranu più....

A ritirata. Avà ci vole à principià à parlanne. Pè a maiò parte di l’auditori di Masai, ghjè un sugettu di cuntrastu in i caffè. Perchè? A ritirata. Analizemu. A ritirata. Ritirà, in fatti, ghjè tirà una altra volta. Ritirà. Invece ch’ùn si tira più, in ritirata, per causa di vechjaia. Nò? Un tippu chì ghjè in ritirata,  ùn tira più nè più hè tiratu. Purtantu si dice: quessu hè ritiratu. Ùn ci si capisce.

Dopu dicenu chì e cascie di a ritirata sò viote. Stunente ùn hè. À rombu d’aritirà i solli di a ritirata per dalli à ghjente ch’ùn tireranu mai più....

Ci vole à capì una cosa: voi i vechji site assai, è noi, i giovani, simu pochi è senza travagliu. Si cerca ghjente per empievi e cascie di a ritirata, da pudeci aritirà e vostre pensioni. Noi ùn pudemu empie nunda. Vulemu ma ùn pudemu. Quale pò empie a cascia ? Ind’è nimu ! S’omu ùn li piglia pè u cullettu, per oblicalli à ciuttà a manu in stacca, à i techji d’euro, à i trapieni di denaru, à i blindati di frasca, da per elli ùn la feranu. I ricchi ùn paganu. Ghjè per ciò ch’elli sò. Ricchi.

Quelli chì s’anu da restà accappunati cum’è merlacconi, ùn site micca voi, i vechji, chì l’avete digià a ritirata, puru sè vo ùn tirate più . Simu noi, i giovani, chì tiremu sempre, senza avella. A ritirata. Allora viderete chì, a v’anu da ritirà a ritirata, postu chè vo ùn tirate più, per dalla à noi chì tiremu sempre.

È tira chì mi ti tira, in tantu simu tutti in a merda.

Tira da quindi o tira da culandi, solli in cascia ùn ne mandi.

Attirati da a ritirata ancu noi, bramemu di smette di tira cum’è scemi. Ma emu da esse sempre quì, à settant’ottu anni, i pantaloni strinti à curighjolu sottu à l’ascelle cum’è Chirac, i pedi adduluriti in i Pattogas è e stacche ch’anu da tintinnà di pillule è di sciroppi. Em’a esse sempre quì, à cuntavvi cianfule incù a voce chì trimuleghja, à voi auditori, chì ancu voi averete a coglia chì stinza. Simu noi i prussimi aritirati ch’ùn tireranu più è chì nisunu tirerà più.

In tantu, sò quì. Eo. Giovanu, bellu, à bastanza in salute, mi benedica.

In tantu, eccumi à a fine di issa cronaca di merda, è, senza esse nè ghjuntu à l’eta di a ritirata, nè di Castineta, m’aritirgu.

Masai: A ritirata