Émissions Toutes les émissions

Masai

masai: A ritiru in a savana

Puru custi, l'omu regna.

Ind’è a savana africana sò andatu. À aritirami di u mondu per pruvà d’esse un spiritu puru, senza esclude tutalmente a pussibbilità d’una passata furtiva incu una africana snella. Ma quessa cuntava pocu. Vulia fà cum’è Charles Eugène de Foucauld de Pontbriand, chì si n’hè andatu in u finimondu di u Saharà Algerinu, à Beni Abbès, à campà in una baracca manghjendu solu fichi secchi.**** Senza esclude tutalmente a pussibbilità una passata furtiva incu una tuaregga snella.

A vi dicu perchì sò andatu à Beni Abbes, un paese saharianu nant’una teppa sott’à a quale si stinza una palmiccia acciambellata in e svolte di l’Oued Saurà. Ci campavanu sempre tandu –pochi anni fà-, dui frati Francesi à mezu à a pupulazione, in u cultu di u ricordu di de Foucauld, ma troppu vechji per pensà à altre cosi chè esprime e so preghere in gesti d’aiutu è di fratellenza versu a pupulazione, disgraziata quant’è elli.

Dunque, eccutimi in a savana à pusà è a pensa à u puru è à l’impuru. Ma mi sò avvistu prestu chì custindi e sole a suchjà eranu e zinzale. Tamante parianu falchi.

È pensa è pensa, nutritu solatitemente da i raghji di u sole africanu. In più bella, mi venu affaccà una infilarata d’animali ch’avianu l’aria d’andà in un certu locu. I pesci, chì campavanu in u pozzu vicinu, i fidighjavanu passà. Curiosi cum’elli sò i pesci di a savana, ùn sò pussuti stà. Anu affaccatu u capu per chjamalli : « eù, induv’andate ? ». È tutti l’animali - i lioni, i grilli, l’elefanti, i vermi, e mosche, i serpi- di risponde: « andemu à l’elezzione di u maestru di u mondu ».

L’ultimi sundaghji davanu u lione favuritu. Si vidia : caminava incù una certa superba.

Dui ghjorni dopu a culonna di l’animali di a savana era di ritornu. I pesci, curiosi, anu affaccatu u capu : « allora quale hè statu elettu, u lione ? », «  innò, anu dettu l’animali ». « Allora quale, quale? ».   « Hè statu elettu l’omu… ».

“Allora simu fritti”, anu rispostu i pesci, aritirendusi.

 

 

Masai 11 02 14 A ritiru in a savana. - Masai