Replay du lundi 21 octobre 2013

Masai: Scemu, Nunda è Nisunu

Mis à jour le

Tuttu hè stortu i ghjorni d'azizume.

image par défaut

Hà capputtatu. Hollande hà capputtatu. Leonarda l’hà scimitu. Ùn ci n’hè cunsiglieri intornu à ellu per dilli chì ch’ellu si sciarlba incù Leonarda ? Ch’ellu hè un scumpientu puliticu, u cuntrastu in i media, trà u Presidente di a Republica Francese è a cullegiana Kosovara ? È chì face a Prima Donna ? Treirweiler ùn li dice nunda à François ? Ellu chì criticava Sarkozy, dicendu ch’ellu guvernava lasciendusi purtà da u ventu di l’emuzione, face listessu. Tuccava à u Presidente di a Republica di trattà issu casu specificu, soga ? Fendu una dichjarazione sulenna à a televisione, in più? U so ministru di l’internu l’hà compiu ellu,  u travagliu bruttu, incù l’appoghju di l’opinione vitrollizata: bastava à sustenelu d’un simplice cumunicatu. Era tuttu benefiziu. Micca issa minestra…

Oghje soffia un ventulellu d’azizume. Tuttu ciò ch’eo fideghju hè stortu. M’hè chjappa oghje issa malatia di u crunistu imbuffatu, persuasu d’avè ragiò contru à u mondu sanu.  Pigliate u cinips chì sterpa u castagnetu. Ci hè tante strutture agricule,  camare dipartipentali, regiunali, Odarc, servizii di u statu… È bè, ci vole ch’ellu sia un associu chì si piglie in affollu a racolta solidaria di solli per stirpà u parasitu di u castagnu ! U mille feuille istituziunale principia à pisà nant’à u stomacu.

Hè vera chì, solli publichi ùn ci n’hè più, pare. Benintesu, cacciatuci l’aiutu à u giru di Francia , ch’hè statu di u benefiziu ch’omu sà pè a Corsica. Hè sigura chi u Centru di e Musiche Tradiziunali è tutte isse manifestazioni culturali ùn aregheranu micca ottu millioni di turisti à a Corsica, vistu ch’ellu ùn ci hè più chè quessa chì conta, oramai. I turisti. A vi dice un scemu, a vi dice. Azezu.

Sentite què per compie. Eranu trè fratelli di lotta: Scemu, Nunda è Nisunu. Nunda si lampa è Nisunu u vede. Allora Scemu chjama u medicu : « venite venite subbitu chì Nunda hè cascatu, Nisunu a m’hà detta… ». « Scusatemi ma, quale site, voi ? », face u medicu. « Sò Scemu… ».

 

Masai 22 10 13 scemu nunda e nisunu - Masai

Mots clés: