Émissions Toutes les émissions

Masai

Masai : SNCM, foot, Palestina

Podcasts :

Simu in una istatina puzzica.

A SNCM, a cuppa di u mondu di pallò, a Palestina. A settimane hè quasi passata è a nostra attualità ùn cambia.

Pè a ennesima volta a Corsica subbisce un cunflittu maritimu longu chì a taglia di u cuntinente francese, senza chì mai una suluzione perenna sbuccie è s’imponga, tantu riguardu à a nostra pulitica di i trasporti maritimi chì pè a sorte di i marinari. Forse issa greva l’hà da rivelà, a suluzione. Omancu si spera.

Hè certa chì, tantu chì i cunflitti suciali, trà i patroni di a SNCM è i so marinari, si ghjucheranu nantu à u spinu di a Corsica, suluzioni ùn ne ponu avè. A Francia ùn hè tocca. I danni sò solu pè a Corsica. Prima chì e cunsequenze di un cunflittu di i marinari, chì taglia l’Isula di u Cuntinente, cummovinu à Parigi, ne ci vole...

Almenu, per u fattu, ch’ellu ùn nasca u parapiglia in Marseglia. Cambiendu di strategia, tandu. Hè curiosa ch’ella ùn accadi mai...

Umbè...Avà, a cuppa di u mondu di futebol .... Chì vulete dì ? Surprese ùn ci n’hè statu. A patrona hè l’Alemagna, cum’è sempre è nantà tutti i campi.

In Brasile risica di ghjucassi in i carrughji, u mundiale, dopu à a concia di l’Auriverdi. U populu brasilianu, hè ancu capace à avè l’opium amaru. Videremu.

In Palestina occupata, l’armata Israeliana bumbardeghja a striscia di Gaza, fendu e decine di morti. I culunialisti Israeliani rimpruvereghjanu à i culunizati Palestiniani, di lampalli qualchì bombe di quandu in quandu. Hè strana, l’indiferenza di i putenti. Sin’à pocu, u populu di un paese accampatu avia dirittu à difendesi. Ma forse a murale pulitica hà cambiatu è ùn sò à currente....

A cunclusione hè chì par avà, simu in una istatina puzzica.

Masai : SNCM, foot, Palestina