Émissions Toutes les émissions

Masai

Masai: U rugby

Podcasts :

Strada diritta !

Chì maccione ! Tulò contru à u Munster, in meza finale di cuppa d’Europa di Rugby. Aghju vistu u macciu dumenica passata. Terribbile e duie squatre.  L’una quant’è l’altra, in u so ghjocu ùn cunnoscenu chè una sola strada per ghjunghje à u scopu ch’elle si sò date: a ligna diritta. Strada diritta pè i quindeci chì ghjocanu è u più forte vince. In l’onore. In u rispettu di e recule è quellu di l’aversariu.

Bella lezziò ancu per noi in Corsica.

Emu un ghjocu puliticu d’attacca in Corsica. Ete rimarcatu? L’iniziative di a Cullettività Territuriale partenu in parechje direzzioni: a coofficialità linguistica, u statutu di residente, u statutu fiscale, a classa pulitica nova di e scorse elezzioni municipali è l’affare ùn si pianta quì. Muvimenti d’attacca rapidi, purtati tecnicamente bè. Estetichi ancu. S’ella ùn cascava male a metafura, in rugby si chjama “u ghjocu à a Francese”. Face ride...

Ma a squatra aversaria, ella ùn cunnosce chè una strategia sola: a difesa spietata. Ancu ancu s’ella era a ligna Maginot, ma hè u muru di Berlinu, u catenaccio talianu di a grande epica di u Milanu. Nisunu passa. Ghjè un ghjocu negativu. Allora cumu fà? Mette in opera u ghjocu à a tulunese, dicenu une pochi: ligna diritta. Issu rugby ghje esteticu di menu, ma d’una grande efficacità, s’omu si ne dà i mezi.

Cosa hè u parè di i partigiani di u rugby puliticu à a tulunese ? Ottene pè a Corsica u statutu chì l’accunsente di fà legi in duminii chì l’ariguardanu. Porta un nome. L’autunumia. Ghjè quessa a strada diritta.

Cumu serà chì in Francia issa parulla face paura allora chì 90% di e regioni d’Europa sò guvernate sottu à issu regime?