Replay du jeudi 17 octobre 2013

Masai: U sacrifiziu di Leonarda

Mis à jour le

A ghigluittina, sintimi ùn ne hà...

image par défaut

Leonarda, si chjama. Hà 15 anni. Ghjè Kosuvara. Stà incù a so famiglia in Pontarlier. In u  Doubs. Capilocu Besançon. Ghjè cullegiana Leonarda. Cullegiu di Pontarlier. A settimana passata, una mane à 7 ore, piglia un carru sculare per andà incù a so classa à visità a fabrica Peugeot. Pocu dopu, a pulizza pianta u carru è chjappa à Leonarda. Espulsione incù a so famiglia. Tutti in Pristina.

Parapiglia è teni. Si forma un cuncistoriu. A lite s’infiara contru à u ministru di l’internu Valls. Ancu in u Partitu Sucialistu.

À l’ingrossu, a critica di manca hè : digià, in a pulitica ecunomica, avà a sapemu, trà a diritta è noi diferenza ùn ci n’hè. Ma eccu chì u trattamentu di l’imigrazione dinù, ghjè listessu à quellu di a diritta. Un calciu in culu è tutti in casa. In i partiti di manca, sucialisti cumpresi, nasce u tira è molla. Sulatimente ci hè un intoppu quand’omu a si caccia incù Manuel Valls : ghjè in u moove puliticu attuale, ellu. L’estrema diritta vince in Vitrolles è Manuel Valls, u ripressivu, hè l’omu puliticu preferitu di i Francesi. Valls ùn si pò critica, ghjè a carta maestra di i sucialisti. Allora, anu trovu a suluzione i deputati PS : ghjè colpa à u prefettu di u Doubs, issu zelatore. U ministru ùn la sapia ciò chì ghjè accadutu.

Si chjama Fratacci u prefettu di u Doubs, si chjama. Lasciemu reghje…

Leonarda, ella,  ùn pensa chè à una cosa, vultassine in casa soia in Pontarlier, à mezu à i so amichi, in u so quartieru, in u so cullegiu. Pristina, u Kosovo, ùn sò i so lochi, sò quelli di i genitori.

Ma a lege, freta è disumana,  ùn ci entre in isse cunsiderazioni. À a lege ùn l’ariguarda si Leonarda hè figliola d’un omu è d’una donna, elli stessi figlioli di a miseria. Sò scappati da e so terre per ùn crepà. À a lege, ch’hè stata rispettata, pare, ùn li face nè callu  nè fretu. A ghigluttina sintimi ùn ne hà.

U ministru di l’internu, mancu ellu ùn si pò lascià addebbulì da i sintimi. Mena seccu.

A carriera, a Francia, capite…

U sacrifiziu di Leonarda hè una necessità.

Masai 18 10 13 Leonarda - Masai

Mots clés: