Émissions Toutes les émissions

Masai

Masai: Un affettu à fette

Podcasts :

U puchjuculu à faccia umana

 

I spermatozoi di Marcantone eranu magrentini chì ohimè.  Mancavanu di quellu intusiasmu chì l’averebbi aiutati à ficcassi in un ovulu un suppulellu cumpiacente. Ma puru s’ella fusse, e trombe uterine di a so moglia Suffìa (cugnumata Sòffia da  une poche chì si pretendianu e so amiche), eranu annudate cum’è s’elle avessinu fattu u serviziu militare ind’è a marina. Infine, femula corta, u coppiu era sterile. Per ùn lasciassi andà à una malincunia ch’omu puderebbi capì, trasferianu u bisognu d’amore di u quale eranu zuffi, nant’à l’animali. Ma i dolci ochji di e so capre, ùn bastavanu à assuppanne u sborru.

Hè sigura chì, una bella faccia a facianu, per fà finta. Per palisà ch’elli a s’avianu ingullita, quella d’ùn pudè avè figlioli. Ma certe volti, impustati di notte à luna nova, à bocca torta, pigliavanu i figlioli di l’altri à petrate.

Una matina, a lofia avia figliatu. Una bella manata di puchjuculelli bianchi è rossi chì prumettianu un bellu sfocu à u bisognu di maternà di Marcantone è di Suffìa. I guardavanu à unu à unu, fendu cummenti nant’à u grugnu di l’unu, a cudinchjula atturcinata di l’altru, denduli nomi da pudelli tene caru, Petruluigi, Karima, Jason, puru s’ella era certa chì, cum’è tutta a razza purcina, avianu da finì in figatelli appicati à travi. Ma in tantu, eranu un’ unguente nant’à e ferite affettive. In più bella, pigliendu di mani l’ultimu ch’elli ùn avianu ancu à fidighjà, si sò avvisti chì u puchjuculellu avia una faccia umana. Innò, Suffìa era andata à a scola, a sapia chì Marcantone ùn pudia…ma l’hà guardatu listessu, cum’è per vede s’ellu ùn ci era una sumiglia. Innò, era una cosa assurda. Sò corsi quelli di l’INRA di San Ghjulianu à prelevà l’ADN, Mario Grazi di Corse Matin à piglià e fottò, Eliane Parigi à intervistà a lofia, Petru Leca di France 3 à circà u pelu in l’ovu. Suffìa, chì sapia riceve, s’hè fatta aiutà da Sòffia per fà e manfare. Hè stata po una bella festa pè u puchjuculu à faccia umana. Marcantone l’avia chjamatu Jean Louis.

Ma u tempu passa è ghje scadutu. Mi dispiace. Dumane vi dicu cum’ella hè finita.

 

Masai 18 03 14 Un affettu à fette. Parte 1 - Masai