Émissions Toutes les émissions

Masai

Masai: Un affettu à fette. Parte 2

Podcasts :

U bisognu d'amore rumpia i chjerchji è Jean Louis ingrassava.

I spermatozui di Marcantone eranu magrentini, e trombe uterine di a moglia Suffìa eranu annudate. U coppiu era sterile, alò. Face chì avianu u corpu pienu d’un amore chì rumpia i chjerchji di a so vita affettiva…

Ta tzin….

 Ghjè a segonda parte di u sfugliatinu principiatu eri. U feuilleton in Francorsu.

A lofia avia figliatu. À mezu à i puchjuculi, ci n’era unu chì avia una faccia umana è ch’elli chjamonu Jean Louis.

Eranu corsi l’esperti è i giurnalisti à vede u fenomenu. Nimu capia cum’ellu era pussutu accade un affare simile. Tutti si sò grattati u tupezzu. Innò micca tutti, certi si sò grattati e palle. Dopu anu fattu « hem hem…Umbè… ». Poi n’anu avutu una techja d’avè i pedi in a fanga di u carciulottu è si ne sò andati in altrò, à scioglie d’altri negozi, fendu « hem hem…Umbè… », grattendusi. I giurnalisti sò corsi in Corti. Ci era una cunferenza stampa per dì ch’ellu si circava sempre a chjave di l’espace de convergence. Infine a vita cuntinuava. Ùn s’avia po dà fà un furmagliu di porcu di issu puchjuculu.

Micca subbitu…

Marcantone è Suffìa. A vita s’hè messa à cuntinuà ancu per elli. Anu allevatu à Jean Louis unghjendulu d’un amore permanente, un mele, chì culava da a so ferita affettiva è facia ingrassà u puchjuculu à testa umana. Eranu fieri. A criatura facia u lardu.

Tempu passendu, eranu sempre fieri è sbuttavanu sempre d’amore, hè vera. Ma ùn era più chjara chjara. Ùn sapianu più s’elli eranu fieri cum’è genitori o cum’è allevatori. Ma d’una banda quant’è da l’altra, era sempre amore.  Marcantone è Suffìa allevavanu dunque à Jean Louis. Aspettavanu chellu sia più grande per purtallu à u Salone di l’Agricultura à rapresentà a Corsica. Fieru, in pienu salone, in cumpagnia di Ghjuvanpetru Acquaviva è Isabelle Don Ignazi, à tichjassi incù l’omi pulitichi, à fassi piglià in fottò incù l’omi pulitichì. Pensate a festa....

Jean Louis, ellu lu corciu, hè ghjuntu à trè anni è ci hè vulsutu à pensà à a scola.

Ma dumane videremu. .

 

Masai 19 03 14 Un affettu à fette. Parte 2 - Masai