Émissions Toutes les émissions

Masai

Masai: Un affettu à fette. Parte 3

I persunagi di issa fola, raporti ùn ne anu incù ghjente di a vita vera...

Jean Louis ingrandava…Jean Louis ! U puchjuculu à faccia umana allevatu da Marcantone è Suffìa (ch’ùn pudianu avè figlioli). È ingranda è ingranda, grassu è tondu, hè ghjuntu à l’età d’andà in scola….

….

Un affettu à fette, parte ultima di u sfugliatinu principiatu ghjorni fà, chì di pulitica ùn possu parlà à trè ghjorni di u primu giru di e municipali. D’altronde, u CSA mi dumanda di precisà chì i persunagi di issa fola –dunque inventata-, ùn anu raportu nisunu incù ghjente di a vita vera chì si presenterianu à una elezzione. Avà, sì  certi si ricunnoscenu, eo ùn ci possu nunda.

...

In tantu, eramu di settembre, a mane di l’entrata di e scole. Marcantone è Suffìa avianu messu un bellu sciortu marinu incù la so maglia frisgiata, à Jean Louis u puchjuculu à faccia umana. Era in scola materna. Bislingua. Bislingua Corsu-Francese. Scola chì integri u purcinu in u bislinguisimu, ùn ne esistia ancu.

A ind’è poi po, Jean Louis ùn era Einstein, ma puru bassu u so nivellu bastava par sevutà in scola. Quandu a maestra di a scola bislingua u chjamava, « Jean Louis viens içi » (ùn sapia micca parlà Corsu a maestra di a scola bislingua) ouiiiiiii, ouiiiiiiiiiiii rispundia Jean Louis. Li piacia d’esse d’accordu à ellu (ouiiiii ouiiiiiiii).

I so resultati eranu cusì cusì, ma era un cameratu tondulu è ottimistu, tuttu di gioia cumunicativa. I so cumpagni li currianu à pressu gridendu. Si campavanu. Ellu dinù. In a corte di recreazione facia falà i so pantaloni corti per fà vede a so cudinchjula atturcinata è si campavanu di rise. Ellu dinù. U tenianu caru.

Ma, a vita purcina, a sapete cum’ella hè. Purcina. Suffìa à l’appiattu si trattava contr’à a sterilità: colpi di piccature è di tisana di rosumarinu. È fà è fà…S’hè trova incinta.  Marcantone era felice. Prestu di Jean Louis ùn anu più vistu a faccia umana, ma solu u corpu di maiale.

Quand’elli anu decisu di fanne prisutti, i so cumpagni di scola, à i quali piacia tantu, n’anu tutti vulsutu una fetta.

-        « À dì chì, ùn avemu mai pensatu à circalli una sumiglia », disse pensoni Marcantone fidighjendu i prisutti appiccati.

-        « Hè forse megliu cusì… », rispose a moglia gardendulu incù u pinzu di l’ochji.

Masai 20 03 14 Un affettu à fette . Parte 3 - Masai