Émissions Toutes les émissions

Masai

Masai: Ùn sò micca induvinu

Podcasts :

Trasporti maritimi è football

Un sò micca induvinu. Quandu scrivu issa cronaca simu vennari passatu, a mane. Voi a state à sente oghje luni. In u fratempu dui evenimenti si seranu passati: a greva di i marinari CGT di a SNCM è u cunfrontu incù i socioprufesiunali è u quartu di finale trà Francia è Alemagna à a Cuppa di u Mondu di pallò.

Voi avà sapete cum’ellu s’hè scioltu -o micca-, u blucchime di u portu di Bastia. A pressione di i socioprufesiunali è di una parte impurtante di l’opinione isulana, hè furtissima contru à issa greva chì impetta u pass’è veni di e marcanzie è di i passegeri è mena un colpu à a stagione turistica. Purtantu, i marinari difendenu u so impiecu, infussati in una cumpagnia chì agunizeghja. Si capisce a so angoscia. Ma ciò ch’ùn si capisce, ghjè perchè avè sceltu una forma di lotta chì si muta in un cunfrontu contru à i Corsi è rende u muvimentu di i marinari CGT impupulare cum’è mai ùn hè statu. Benintesu chì i marinari devenu salvà u so impiecu, ghjè una priorità. Di siguru chì u statu e i patroni di a SNCM sò rispunsevuli di a situazione suciale di issi travagliadori. Ma micca a Corsica. In l’isula, si sparghje a certezza chì a soluzione di a crisa in i trasporti maritimi, trapassa u cunflittu internu à a cumpagnia in periculu di morte. A Corsica si deve dà i mezi d’amaestrà i so trasporti. Ma à corta scadenza, ùn si pò chjode l’ochji di fronte à u drama umanu di issa ghjente in periculu di perde u so impiecu.

Pettu à quessa, u futebol ghjè più chè mai l’opium chì calma i dulori di u populu. Vistu chì simu luni, voi sapete oghje sì a Francia hà vintu o persu u so quartu di finale è s’ellu s’hè verificatu quellu sundaghju chì corre nantu à a Tela: indetta chì i Corsi chì sustenenu a Naziunale Francese serianu in minurità. Si spieca, vistu u pessimu statu di e relazioni trà l’Isula è a Francia. Ma quand’eo scrivu issa cronaca, simu vennari scorsu di matinata. A sola cosa ch’eo possu dì, hè ch’aghju vistu qualchì bandera tedesca appiccata à e finestre.

Sunniemu inseme à un mondu induve u fotebol ùn serà più un temestà cullettivu, ma solu l’occasione d’un incontru spurtivu.

 

Masai: Ùn sò micca induvinu