Émissions Toutes les émissions

Masai

Masai : Una lacrima di caffè

Podcasts :

Incontru in Cartaldo

Hà mille anni, a vechjetta chì cosge i so passi incù pacienza, in u carrughju di Certaldo, un paese di a campagna Tuscana. À vedela, hè fatta cum’è i muri di i casali rinascimentali : estetica, cunservata, viva, eterna. À sapella, invece, hè umana.

L’ochji ch’anu persu u so culore, fideghjanu senza vede. Sò dui isulotti persi à mez’à una faccia di cartapesta, a pelle stranamente mora, ella ch’ùn s’hè mai tesa à u sole. Stà in par’ di terra à u numeru nove di u solu carrughju chì abbia una certa impurtanza in u paese altu di Cartaldo. Boccace, prima ch’ella li venga a scimità di scrive u Decamerone, nacque ancu ellu quì, à dui passi di a casa di a vechjetta incù a so faccia di cartapesta.

Hà e so abitutini. Ogni mane  esce da u purtone à passucci cauti, franca u carrughju lenta lenta è entre in u caffè ghjustu in faccia. Una stonda dopu affacca incù una tazzina in manu, riface i so passi à l’aritrosa è và à pusassi nant’à una panca stallata in un catagnu di u carrughju à u fescu, ingirata di vasi di terra cotta duv’elli fiuriscenu garofani rossi infiarati. Custì, si suchjuleghja u so caffè matinale, ochji mezu chjosi. Di i so mille anni di vita, li ferma solu issu piacè, u caffè matinale nantu à a panca. Ne gode ogni attimu à sursatelle, incù una ecunumia attenta. Ùn si lascia perde nunda tantu ch’ella resta una candella. Quandu a tazzina hè viota, tuttu hè finitu ; riapre l’ochji foschi chì riprincipianu à guardassi nentru.

Dopu à una stonda si rizza è incu a so tazzina viota in manu, varca di novu u carrughju, rientre in caffè è ne esce senza.

Si stà ferma nantu à u sigliare, gira u capu à diritta poi à manca. Deve decide chì strada si piglià. Averà decisu ? Eccula chì s’avanza à passi misurati è piglia à parte manca, senza a tazzina. U corsu di a so strada ùn hè dirittu ma tuttu à trincate dolci cum’è quelle d’un fiume ch’hà persu a so forza ghjunghjendu in locu pianu.  Tutta à zighizaghi, s’alluntana da ind’è ella, u numeru nove di u solu carrughju di Certaldo chì abbia una minima impurtenza è s’avvicina di u piazzale culà in fondu in fondu.

Ùn hà primura sì dopu li ci vulerà à dassi a forza di vultà. Ùn ci pensa, conta solu  a stonda chì passa è u ricordu di a tazzina incù a so lacrima di caffè.    

 

Masai 06 03 14 Una lacrima di caffè - Masai