Émissions Toutes les émissions

Masai

U viaghju internu

Podcasts :

Falendu in a caverna...

I had a dream... Era forte Martin Luther King. Ùn ci n’hè tanti in u mondu ch’anu fattu un discorsu chì hè entratu pè u sempre in a storia di l’umanità.  Ma micca una frase, un mottu di cumunicazione cappiatu cusì pè i media, generu u « i am a berliner » di Kennedy. Innò, un mumentu strutturatu d’arte oratoria incù idee è imagine intricciate, chjamate à sviluppà una filusufia chì participeghji à cambià u mondu. Quandu ci n’hè ?

Ùn la so mica a risposta è à dilla franca mi n’enfuttu.

Issu introitu, era ghjustu per divvi chì ancu eo aghju fattu un sognu. I had a dream. Aghju sunniatu ch’eo era un tenia –un vermu sulitariu- è ch’eo vidia à Scarlett Johanson, ma da nentru. Hè tuttu un’ altru spetaculu chè ciò ch’omu vede nantu à i schreni. Scarlett Johanson, ma da nentru, hè menu sexy chè quella, ma da fora. Ma assai di più interessante.

Sò un tenia è vecu à Scarlett Johanson, ma da nentru. Internu notte. Mi spasseghju in a natura interna. Travelling nantu à e budelle di  Scarlett Johanson. Ghjè curiosa, sò listesse à quelle di Ghjuvanpetru Acquaviva. Interessante nò? Scarlett Johanson è Ghjuvanpetru Acquaviva sò listessi listessi, ma ar’ di nentru, quand’omu hè un vermu sulitariu. Ar’ di fora cambia assai. Ancu Martin Luhter King hè listessu à Scarlett Johanson è Ghjuvanpetru Acquaviva ma ar’ nentru. Ar’ di fora camba assai. È eo dinù. U sandwich ch’eo vengu di fami falà trova ch’eo m’assuligliu à Scarlett Johanson.

 

A i vermi solitarii ch’anu un minimu di cuscenza, ùn li piacenu i rumenzulaghji di a natura umane interiore. Fughjenu. Vi possu dì una cosa. Quand’eo era un tenia, i rumenzulaghji interiori di Scarlett Johanson m’anu fattu fughje. M’anu fattu fughje, altr’è tantu ch’ella m’hà attiratu cum’una calamita, quand’eo sò turnatu omu, a so natura esterna.

U scopu finale di u viaghju, quand’omu si move in l’interni di a nostra umanità, hè di ghjunghje à u cervellu, micca in altrò. Ci hè sempre u cervellu. Puru pocu, ci hè. Basta à insiste, à ùn perde mai curagiu in issu difficiule viaghju in a caverna. Basta à intestassi è in qualcosa chì s’assumigli à un cervellu si finisce per ghjunghje. Intantu, sè vo stancate, firmatevi à u core. Hè bè dinù....

 

Masai 07 04 14 viaghju interiore