Replay du samedi 27 février 2021

Navighendu annantu à u web : A m'hà dumandata Diu...

Navighendu annantu à u web, oghji, ci faremu un ghjirettu in la cità di Limoges da cuntavvi dui fatti belli strani chì sò accaduti dui sittimani fà…

Limoges
Limoges © Getty - Jean-Marc Charles

L’ottu di farraghju scorsu, versu 2 ori di mani, u carrughju di u Maréchal Juin paria tuttu un ruminzulaghju : mobuli, strapunti, scarpi, ordinatori, cazzaroli… C’era di tuttu, c’era ! Ma da induva sarà cascata tutta sta robba ? 

Da sapella, bastava à pisà u capu posta ch’ellu era un omu chì stava à u sestu pianu d’un palazzu chì lampava tuttu ciò ch’ellu t’avia in casa da u balcò ! I pulizzieri chjamati da i vicini sò stati custretti à sfundà a porta da arristà l’omu chì sfrumbulava tuttu sottu à u sguardu di a moglia è di i quattru figlioli spavintati…

S’ellu facia què, à sentalu dì, era pà rispittà l’ordini di Diu chì l’avaria cumandatu di ghjittà tuttu ciò ch’era matiriali. Dopu, hà fattu neci di saltà ma pà furtuna, sò riisciuti à chjappallu. È infini, sò ghjunti i succorsi da purtallu à u spidali in u sirviziu di psichiatria…

A sera, in un antru quartieri di a cità, un coppiu hà chjamatu u 17 par via d’un cunflittu in famiglia. Quand’elli sò ghjunti in casa, baruffi ùn ci n’era : s’elli ani fattu vena a pulizza l’omu è a donna, era solu parchì u figliolu avia ricusatu di sbarazzà u so piattu dopu magnatu…  Com’ellu cantava Serge Gainsbourg : no comment ! 

Mots clés: