Replay du samedi 29 mai 2021

Navighendu annantu à u web : A nostra midicina

Navighendu annantu à u web, ogni mesi, in lu mondu sanu, sò più di 2 miliardi di parsoni chì vani à fighjulà filmetti annantu à u famosu situ americanu Youtube criatu in lu 2005 è chì da tandu, cunnosci un successu ch’ùn faci cà crescia…

Pastizzu
Pastizzu © Getty - Bloomberg Creative

Pà misurà a putenza mundiali di sta piattaforma, vi daraghju unipochi di sciffri. In un’ora, di regula, sò 30000 ori di cuntinutu filmatu chì sò publicati annantu à Youtube. Tutti sti videò missi in un’ora, s’omu i vulissi guardà tutti, ci vurria à passà 82 anni davanti à u so screnu !

88 000 hè u numaru di filmetti chì sò visti à ogni siconda. Ùn si parla nè d’ori, nè di minuti ma di sicondi o figlioli ! Youtube hè dispunibuli in più di 100 paesi. D’altrondi, hè traduttu in 80 lingui quandu chì Facebook ùn ni conta cà 43. Un’antra infurmazioni impurtanti hè quissa quì : 90% di l’utilizatori dicini d’avè scupartu una marca o un pruduttu novu annantu à Youtube.

L’annu scorsu, hè quì chì a Francia sana hà scupartu u prufissori Didier Raoult chì ci parlava di l’efficacità di l’idrussicluruchina contru à u Covid 19. I soi l’intervisti sò stati visti da milioni è milioni di parsoni. 

Sti pochi tempi, si ni parlava bellu menu ma calchì ghjornu fà, hè Philippe de Villiers chì hà ammintatu dinò quilla midicina annuncendu à a televisiò chì u duttori Raoult l’avia guaritu denduli l’idrussicluruchina è fenduli bia dui bichjeri di pastizzu à ghjornu. Quistu sì u trattamentu ! Avà, aghju capitu parchì ind’è noi, prima di sciaccacci un 51 bellu frescu, si dici sempri : « È ch’ella sia a nostra midicina ! »

Mots clés: