Navighendu annantu à u web : I spartimenti

Dui anni fà, quand’ellu si ni morsi u famosu stilistu alimanu, Choupette tuccò più di 3 milioni d’auri par avè ghjucatu in parechji publicità. L’affari di a lascita di Lagerfeld ùn hè ancu arrigulatu cù 7 eredi ch’aspettani sempri ma Choupette, a so parti po l’hà avuta ! D’altrondi campa sempri com’è una principessa chì hè stata cunfidata à una certa Françoise chì si n’accupa quant’è ch’ella fussi a figliola.

Ancu s’ellu sarà l’asempiu più famosu, parsoni chì mettini l’animali di cumpagnia in lu so tistamentu, ci n’hè unipochi… A saparani i figlioli di st’agricultori indianu di 50 anni, ch’ùn tuccarani mancu un centimu posta chì u babbu, dillusu d’elli, vò dà tuttu à a siconda moglia è à Jacky, u so ghjacaru chì duvintaria tandu, u prupiitariu d’un tarrenu agriculu di 4 ettari ! 

Mi faci pinsà à a famosa canzona di i Fratelli Vincenti, I Spartimenti, chì dopu à ‘ssa storia, pò piglià un versu novu. È sì l’affari accadi ind’è noi, si pudaria cantà cusì :

• « Hè tocca à tè o Ribellu
• A casa è simu cuntenti
• Da quand’è t’eri catellu 
• Sò fatti li spartimenti
• Sarei tù lu patrone
• È farè ancu l’ortu 
• Chì ti lasciu u me zappone
• A sò ch’e ùn aghju tortu
• A casa hè per tè !
• Abbaghji, perchè ?
• Ùn sai zappà ?
• Ma chì ci possu fà ? »