Replay du samedi 22 mai 2021

Navighendu annantu à u web : Merri da luntanu

Navighendu annantu à u web, in l’universu corsu di i reti suciali, sò parechji sittimani ch’ellu ci hè un sughjettu chì supraneghja tutti l’altri : vogliu parlà di sicuru di l’alizzioni tarrituriali di u 20 è u 27 di ghjugnu…

Casa cumuna
Casa cumuna © Getty - Philippe Turpin

Ind’è noi, annantu à i deci listi prisenti, ci truvemu parechji merri di l’isula sana chì, ùn ci saria mancu à pricisalla, campani tutti in la cumuna ch’elli direghjini. Sicura chì quand’ellu si tratta d’un elettu di prussimità, u mandatu chì ci veni subbitu in menti hè quillu di u prima maghjistratu d’un paesi o d’una cità.

D’altrondi, ùn vecu micca comu si pudaria fà pà ghjistiscia una municipalità senza essa sopra à locu. Ùn a m’eru mai dumandata chì pà mè, ùn era mancu pussibuli. Eppuru, asisti. Tandu, spartaraghju incù voi una storia abbastanza incridibuli ma chì hè vera è chì ci hà da fà viaghjà.

Ci n’andaremu in Guignecourt, un paesi di l’Oise chì conta guasgi 400 abitanti. U so merri si chjama Philippe Désirest, hè elettu dipoi u 2002 ma sò cinqui mesi ch’ellu s’accupa di a so cumuna è di i so paisani in teletravagliu. 

Altra scelta ùn n’hà vistu ch’ellu stà dipoi u mesi di ghjinnaghju in Nova Caledonia chì a moglia t’hà avutu a so mutazioni in Nouméa. Semu quì in una situazioni bella strana ma legali !

In Guignecourt, ognunu dici a soia : à chì dici ch’ella hè vargugnosa, ch’ellu ùn hà cà à lacà a so piazza è à chì trova chì prublemi ùn ci n’hè è chì u so travagliu, u faci bè ancu da luntanu. 

Ma avà o cari, vi devu lacà chì i me culleghi americani m’aspettani à u cunsigliu municipali di Paoli City ! See you !

Mots clés: