Replay du samedi 30 janvier 2021

Navighendu annantu à u web : Murescu, a reti suciali corsa !

Navighendu annantu à u web, u 19 di ghjinnaghju scorsu, semu stati parechji à scopra incù piacè u situ «murescu.com». Si tratta di a prima reti suciali à l’usu Facebook cuncipita in lingua corsa cù a vulintà d’adduniscia i corsi di u mondu sanu…

Murescu
Murescu - .

Reti suciali, annantu à a tela, ci n’hè in quantità è si ni trova di tutti i maneri. Annantu à Facebook, Twitter o Instagram par isempiu, sò belli numarosi i corsi è sò unipochi quantunqua à scriva in la lingua di Cirnu. Da cuntrastà in corsu annantu à tutti i sughjetti, c’erani dighjà i fori com’è u Foru Corsu o Isula Foru chì sò stati impurtantissimi.

Ma quì, cù Murescu, hè a prima volta ch’omu si pò scriva annantu à una reti suciali pinsata in corsu è chì t’hà i listessi funziunalità maestri cà Facebook. Hè cusì chì tutti i Mureschi t’ani a pussibulità di sparta publicazioni scritti, ritratti, filmetti, di crià gruppi ma dinò di leghja è di participà à u blogu, à u foru è po d’avè discussioni privati incù a chjachjarata.  

Aldilà di a lingua è di ‘ssu spiritu di spartera, un antru elementu chì faci l’identità di Murescu hè dinò a risa posta chì a macagna hè assai prisenti. Ùn vi pigliaraghju cà dui asempii : quand’ellu si ricevi una dumanda d’amicizia dighjà, s’hà dui scelti : a prima hè d’accittà è a siconda, s’omu ricusa hè «mancu per ride ». È dopu, in lu spaziu chì ci permetti di scriva è di publicà, eccu ciò chì si pò leghja : « Aiò ! Dilla ! Ai un puttachju ? Dilla ! »

Ancu s’ellu ùn asisti cà dipoi dui sittimani, Murescu chì hè statu criatu da Stefanu Barbagelata, prufissori di i scoli bislingui, accogli ogni ghjornu membri novi pronti à sparta è à campassi! Avà chì vo sapeti ciò ch’ellu hè, s’ella ùn hè ancu fatta, ùn aspitteti più o cari è scrivitivi puri !

Mots clés: