Replay du samedi 20 février 2021

Navighendu annantu à u web : Una casa stretta stretta…

Navighendu annantu à u web, annunci pà a vendita di tarreni, di casi o d’appartamenti, si ni pò leghja ogni ghjornu à tutti l’ori ma in stu mesi di farraghju, ci n’hè unu chì hà stunatu u mondu sanu…

London
London © Getty - Sylvain Sonnet

Quand’omu cerca una casa, si devi piglià in contu parechji criterii : u quartieri, u numaru di stanzi, a chjarura, u prezzu, i travagli da fà è po di sicuru : u spaziu è i diminsioni… In Londra, pà 1,1 milioni, vi pudeti cumprà una casa di 5 piani ! Ditta cusì, si pudaria dì « è parchì micca ? », ma a vi pudeti pinsà, ci hè calcosa ch’ùn và…

5 piani sì ma qual’hè chì camparia in una casa d’1,7 metru di largu ? Què, saria a larghezza d’un curridori… È ancu ! Comu ci stà una famiglia in una casa com’è quissa ? A sola suluzioni saria ch’ognunu t’avissi u so pianu !

Da ghjustificà u prezzu sprupusitatu di st’alloghju, u dirittori di l’agenza in carica di a vendita, faci valè a so urighjinalità è po u fattu ch’ellu fussi statu un magazenu di cappelli à l’epica vitturiana, ciò chì ni faci un pezzu unicu di a storia di  Londra è di a magia di a cità… Pà cunvincia à calchissia di cumpralla, ci hà da vulè à essa bonu…

Pà compia a nostra cronaca, ci ni staremu in Ingliterra cù a storia di Russel Jones, un omu ch’era cascatu è chì tandu, marchjava incù i crochji… Un ghjornu, s’hè avvistu chì u so ghjacaru, com’è ellu, scianchittava. L’hà purtatu ind’è u vitarinariu è hà fattu tutti l’asamini da sapè ciò ch’ellu t’avia…

Dopu à avè spesu 400€, u duttori l’hà imparatu chì u ghjacaru Billy ùn avia nulla è chì s’ellu scianchittava, era solu pà fà com’è u so patroni. È in più di quissa, si n’era avvistu chì quand’ellu ùn era micca incù Russel, ùn scianchittava manc’appena ! S’ellu facia cusì, era solu pà mustralli u so sustegnu ! Una billissima prova di sulidarità è d’amicizia !

Mots clés: