E BREZHONEG | Tro Dro Dit, ur chadenn video e bro Kemperle

Frouezh ur c'henlabour eo Tro Dro Dit etre ar stroll kevredigezhioù Ti ar Vro, Kuzul departamant Penn ar Bed ha Kemperle Kumuniezh. Ar videoioù a vez sevenet gant Trigone Production hag ar gevredigezh Fea. Fanny Chauffin, e penn ar raktres a gav dezhi eo Tro Dro Dit ur "seurt mekanig a vo tu implij gant an dud forzh peseurt oad, ha ma vo tizhet ar pal gant Kuzul departamant Penn ar Bed, liammañ ar remziadoù oad ha n'em gomprenont ket mat a-walc'h".

Treuzkas 

Lakaat tud a rummadoù disheñvel da gejañ an eil gant egile, da zeskiñ an eil gant egile, sed aze unan deus palioù Tro Dro Dit, ouzhpenn kinnig ur chadenn video glok. "Un doare da dreuzkas danvez glad met ivez da lakaat da glevout sonioù disheñvel ha da lakaat brezhoneg bro Gerne war-wel" a embann Fanny Chauffin.  

Ur benveg bedagogel 

Dre an istitloù e galleg hag e brezhoneg e c'hell neb a gar heuliañ ar video o kompren ar ster. An dud ha n'int ket brezhongerien a c'hell kompren neuze, hag ar vrezhonegerien a c'hell deskiñ lenn war un dro.