Brest : degemerus e oa bet ar vusulmaned gant ar Vrestiz all
Par Tudi Crequer, France Bleu Breizh Izel samedi 9 janvier 2016 à 20:15
Degemeret e oa bet ar Vrestiz e Kreizenn sevenadurel musulman Almadina, da geñver un devezh broadel aozet gant ar CFCM (Conseil Français du Culte Musulman). Un digarez a-feson e oa evit eskemm gant musulmaned ar vro ha kompren gwelloc'h petra eo an Islam.
"Amañ, n'eo ket ur voskenn met skol gozh infirmourez ar C'hroaz ruz. Prestet eo al lec'h-mañ da gevredigezh musulmaned Brest, gant an ti-kêr, keit a ma vez kaset labourioù er voskenn gozh", a zispleg deomp Fulup Abalip. Hemañ zo deuet da vezañ musulman meur a vloavezh-zo. Displegañ a ra pep tra deomp daoust ma n'eo ket kustum da zont amañ kenneubeut. Kavout a ra gwelloc'h chom 'ba gêr evit pediñ.
Kompren gwelloc'h an Islam
Deuet e oa meur a gant den a-hed an devezh el lec'h-mañ evit dizoloiñ al lec'h. Deuet e oa da skouer Jean Miossec, ur brestad, da welet "e pelec'h emañ ar vusulmaned o pediñ". Fañch Moysan, ur brestad all, a gav dezhañ eo un dra vat seurt darvoudoù, rak "kalz a dud a zo erruet evit kompren gwelloc'h petra eo an Islam".
"C'hoant e m'oa eskemm gant musulmaned ar vro", Jakez Andre
Dedennet bras e oa ivez Jakez Andre, ur brestad all, da gemer perzh en darvoud-mañ. "Ar wech kentañ e oan bet en ur voskeen e oa e Damas, 40 vloaz-so. Ne m'oa ket komprenet kalz a dra. D'ar mare-se, ne m'oa ket lakaet c'hoazh ma fri er C'horan. Tamm ha tamm, da c'houde, e m'eus kroget da lenn ha klask kompren pesuert mennozh a oa gant ar vusulmaned. Peogwir hon o chom e Brest e m'eus ar c'hoant da eskemm gant musulmaned ar vro ivez."
Ur relijion a beoc'h
Un digarez e oa ivez an dervezh-se evit sevel goulennoù ouzh Slimane Harrag, prezidant an ACMB. "Dedennus eo e zoare da wel an Islam, digor e spered. Evitañ, hag evidomp, hor relijion a zo ur relijion a beoc'h hag a vreudeuriez. Netra da wel gant ar brezel. Ouzhpenn da-se eo ur paotr chik, va c'helenner arabek eo !", eme Fulup Abalip.
Goude ar prezegennoù e oa bet pedet an dud da astenn ar gaoz en ur evañ ur banne te ha debriñ gwastilli ha boued lipous. "Brav e oa", eme Fañch Moysan. "Ret e vefe sevel seurt traoù bep ploaz !"